Bağçasaraydaki ekinci «Hizb ut-Tahrir davasınıñ» mabüslerine domuz etli aş bermege devam eteler. Bu aqta Server Mustafayevniñ advokatı Lilâ Gemeci Qırım.Aqiqat mühbirine bildirdi.
«Aynı aşlar, küf aş, galet peçenye, çay, sebze ezmesi ve domuz terili paştet bermege devam eteler. Bugün üyle teneffüsinde müvekkilim Server Mustafayev çay içti, peçenye aşamadı, çünki küfi bar edi, ezme aşamadı, o teneke qutusında ola ve onı tek SİZOğa kelgende bereler. Olarnı SİZOdan qaçta çıqarğanlar tam olaraq aytıp olamayım, amma saat 10:00-da mahkemede ediler, 8:00-dan keç çıqmağanlar, dep tüşünem, çünki bütün protseduralarnı keçeler», – dep qayd etti Gemeci.
Advokatnıñ aytqanına köre, çoqusı allarda qabaatlanğanlar aqşam yemegine barmay, çünki mahkeme oturışuvları saat 18:00-dan soñ bite.
«Olarnı SİZOğa ketirgence, baqılğance, kameralarına qaytqance – aqşam yemegi bite. Bugün mabüsler olarğa insaniyetsizce yanaşalar dep muracaat etti ve bu işkence ola. Eki künden berli yahşı aşamaylar. Qadı buña emiyet bermedi», – dep tarif etti Lilâ Gemeci.
Advokat Nazim Şeihmambetov musulman olğan Bağçasaraydaki ekinci «Hizb ut-Tahrir davasınıñ» mabüslerine mahkeme oturışuvları vaqtına domuz etli aşlar berile, dep haber etti.
Noyabrniñ soñunda Bağçasaraydaki ekinci «Hizb ut-Tahrir davasınıñ» mabüslerine Rusiyeniñ Rostov-na-Donu şeerindeki №1 SİZOsında küflü ve domuz etli ag berildi, dep haber etilgen edi.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
