Bağçasaraydaki «Hizb ut-Tazirir davasınıñ» mabüsi Edem Smailovğa Rusiyeniñ Rostov-na-Donu tahqiqat izolâtorına közlük yollamaq içün retsept yazılacaq teşkerüvni bir aydan berli keçirmeyler. Bu aqta advokat Nazim Şeyhmambetov Qırım.Aqiqat mühbirine tarif etti.
Onıñ aytqanına köre, SİZO memuriyeti Edem Smailovnıñ arizasını bir aydan berli baqmay.
«Mesele Edem Smailovğa tuvğanları tarafında közlük berilmegeni degil. Közlük berilüvi içün – SİZO tibbiy bölügi retsept yazmalı. O, bir ay evelsi ariza yazdı, baqıtrıp, bir retsept berilmesini istedi. Lâkin onı alâ daa baqmadılar. SİZO cevap bersin dep, muracaat yollaycaqmız, cevap kelmese, areketlerini şikâyet etecekmiz», – dep tarif etti Nazim Şeyhmambetov.
Tahqiqat izolâtorınıñ memuriyeti advokatnıñ aytqanlarını şimdilik izaatlamadı.
Rusiye mahkemesi Bağçasaraydaki ekinci «Hizb ut-Tahrir davasınıñ» mabüslerini 2020 senesi mayısnıñ 13-ne qadar apiste qaldırdı.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
