Bağçasaraydaki ekinci «Hizb ut-Tahrir davasınıñ» mabüsi Marlen Asanovnıñ sağlıq vaziyeti fenalaştı. Bu aqta advokat Emil Kurbedinov Qırım.Aqiqat mühbirine bildirdi.
Onıñ aytqanına köre, Asanovnıñ büyrek problemleri ve varikozı başlandı.
«Marlen Asanov mahkeme oturışuvı vaqtında büyrek problemleri ve varikozı başlandı, dep bildirdi. Marlen Asanovnıñ aytqanına köre, o, hastalıq ağırlaşacaq dep, tedqiq ve tedaviylev içün ariza berdi. Onı feldşerge köstergenler, baqıp ilâc yaşçğanlar, lâkin talil yapmağa razı olmadılar. Marlen Asanov tedqiqsiz yazılğan ilâclar sağlığına zarar ketire bileceginden qorqıp, olarnı almağa kerekmi dep bilmey. Menim fikirimce, taliller aselet yapılmay, çünki hastalığı isbatlansa, onı SİZOdan tedqiqlerge çıqarmağa kerek olacaq», – dep tarif etti advokat.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
