Rostov-na-Donunıñ Cenübiy okrugınıñ arbiy mahkemesinde Bağçasaraydaki ekinci «Hizb ut-Tahrir davası» gizli şaatınıñ sorğusı devam etti, dep bildire Qırım.Aqiqat mühbiri.
«Bugün Timur İbragimovnen bağlı gizli şaatnıñ sorğusı devam etti. Şaat tahqiqatçı keçirgen sorğu protokolında qayd etilgen bir şeyni tasdıqlamadı. Tahqiqatçınıñ sorğusında ıstılalarğa, hususan diniy ıstılılarğa esaslanıp, tam bir cevap bergen olsa, bugün sorğuda olğan ıstılalarnı qullanmay, dep ayttı. Misal olaraq, «ilâhiyat» sözü onıñ içün yañı bir şey. «Tendentsioz fikir» – ilk sefer eşite ve bunı iç bir vaqıt qullanmadı. Amma onıñ ifadesinde bu yazılğan. Yazığa baqılsa, ilimler kandidatı izaat berdi kibi kele, asılında ise – sözlerniñ manasını bile bilmey», – dep ayttı advokat Ayder Azamatov.
Ayder Azamatovnıñ aytqanına köre, gizli şaatnıñ mahkemeden aytqanları tahqiqatçı keçirgen sorğu vaqtında aytqanlarına uymay. İmayeciniñ bildirgenine köre, gizli şaatnıñ mahkemede bergen malümatı "bu şaatnıñ bir şeyden haberi olmağanını isbatlay". Azamatov, mahkemede sorğuğa çekilgen kişçi ve protokolda malümat bergen kişi bir insan olğanından şübhelene, dep bildirdi.
Azamatovnıñ aytqanına köre, oturışuv vaqtına dava malümatlarına kene aş berilmedi, soñra narazılıq bildirildi. İmayeci, qadı davada martnıñ 2-ne qadar teneffüs ilân etti, dep bildirdi.
Hatırlatamız, fevralniñ 25-nde Bağçasaraydaki «Hizb ut-Tahrir davasınıñ» mabüslerine daa keçken mahkemede qullanuv müddeti bitken aş berildi.
Fevralniñ 25-nde imaye tarafı Bağçasaraydaki ekinci «Hizb ut-Tahrir davasınıñ» birinci gizli şaatını sorğuğa çekip başladı.
Daa evel advokat Ayder Azamatov, Bağçasaraydaki ekinci «Hizb ut-Tahrir davası» boyunca tizilgen mahkeme oturışuvları cedveli dava mabüsleriniñ imaye aqqını bozıp, olarğa mahkeme oturışuvlarına azırlanmağa imkân bermey, dep bildirdi.
Bundan evel Rostov-na-Donunıñ Cenübiy okrugınıñ arbiy mahkemesinde qabaatlap tarafı Bağçasaraydaki ekinci «Hizb ut-Tahrir davası» mabüsleriniñ psihiatrik ekspertiza malümatlarını seslendirip başladı.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
