Kreml kontrolindeki Aqmescitniñ Kiyev rayon mahkemesi Bağçasaraydaki «Hizb ut-Tahrir davasınıñ» mabüsleri Alim Sufyanov ve Seyran Hayredinovnıñ apis müddetini 2021 senesi martnıñ 2-ne qadar uzattı. Bu aqta advokat Lilâ Gemeci «Qırım birdemligine» bildirdi.
Mahkeme, qabaatlanğanlar «saqalana, gizli şaatlarnı qorquza bile» dep, tahqiqatçınıñ muracaatını qanaatlendirdi.
«Tahqiqatnıñ fikirince, müvekkillerimiz 2015 senesinden berli cinaiy faaliyetnen oğraştı. Amma 5 yıl olğanına baqmadan, Qırımnı terk etmediler, içtimaiy bağları küçlü. Hayredinovnıñ üç kiçkene balası bar, apayı ve saqat ana-babasını baqa. Müvekkillerimizniñ cinaiy faaliyetnen oğraşqanına dair tahminlerden ğayrı başqa bir sebep yoq. Daa doğrusı, cinaiy faaliyetnen oğraşqanlarına dair bir fakt da yoq. Tahqiqat delilleri tahminlerge ve bizge alâ daa belli olmağan ses qaydlarına esaslana», – dep bildirdi advokat.
Tahqiqat, oturışuvda «çoq tahqiqat tedbiri keçirilmeli», dep ayttı. İmaye tarafı itiraz bildirse de, mahkeme qabaatlayıcı tarzda qarar aldı. Advokatlar apis müddetini uzatuv qararına qarşı istinaf şikâyetini azırlay.
Gemeci aytqanına köre, Hayredinov ve Sufyanov COVID-19 oldı ve «tahqiqat izolâtorı şaraitlerinde peyda olğan çeşit hastalıqlarnen» çekişe.
«Müvekkillerimiz psihiatrik hastahanesinde olğanda koronavirus yuqunçına oğradı. Şimdi SİZOda tutula. Alim Sufyanovnıñ dermatologik problemleri peyda oldı, qollarda eşken bar, tahminlerge köre gerpes ola bile. Tahqiqat izolâtorında kerekli tedaviylev yoq. Seyran Hayredinovnıñ da hastalıqtan soñ aşqazan-içekler problemleri başladı», – dep ayttı advokat Gemeci.
Daa evel berilgen malümatqa köre, Bağçasaraydaki «Hizb ut-Tahrir davasınıñ» mabüsleri Seyran Hayretdinov ve Alim Sufyanov Aqmescitniñ №1 psihonevrologik hastahanesinde mecburiy psihiatrik ekspertizada edi. Anda COVID-19 hastaları çoq.
Aqmescitniñ №1 psihonevrologik hastahanesinde COVID-19 hastaları içün hastahane yapıldı, dep bildirdi Qırım ve Aqyardaki Rospotrebnadzor idaresiniñ yolbaşçısı Natalya Penkovskaya.
Penkovskaya, hastalıq tarqaluvınıñ sebebi «tibbiyet hadimleriniñ diqqatsızlığı» oldı, dep ayttı. Onıñ qayd etkenine köre, epidemiologiye tahqiqat devam ete.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
