Bağçasaraydaki ekinci «Hizb ut-Tahrir davasınıñ» mabüsi Marlen Asanov Rostov-na-Donu SİZOsınıñ mahsus blokında gece-kündüz video nezareti altında buluna. Bu aqta «Qırım birdemligi» cemaat birleşmesi ömür arqadaşı Ayşe Asanovanıñ aytqanlarına esaslanıp bildire.
O, aqayınen qısqa körüşüvge bardı, dep qayd etti.
«O, mahsus blokta olğanını ayttı – anda video kameraları bar, onı künde 24 saat devamında közeteler. Kamera ölçüleri pek küçük, 2h3 metrlik odaçıq, eki töşek bar ve tar bir boşluq (biriniñ keçmesi içün ekincisi töşekke oturıp, ayaqlarını kötermek kerek). Künde bir kere olarnı bir saatqa kezmege çıqaralar – uzun divarlı odağa, tavanda 4h4 parmaqlıq bar», – dep tarif etti Ayşe Asanova.
Onıñ aytqanına köre, ömür arqadaşınıñ tiş problemleri peyda oldı, tiş ekimi tedaviylemege razı olmadı, çünki «belli şaraitler olmaq kerek».
Rostov-na-Donu SİZOsınıñ memuriyeti bunı izaatlamadı.
Noyabrniñ 15-nde Rusiyeniñ Rostov-na-Donu şeerindeki Cenübiy arbiy okrugınıñ mahkemesi Bağçasaraydaki ekinci «Hizb ut-Tahrir davasını» temelden baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
