Bağçasaraydaki ekinci «Hizb ut-Tahrir davası» mabüsleriniñ tuvğanlarına koronavirus karantini sebebinden körüşüvler yasaq etildi. SİZO memuriyeti bergen malümatqa köre, körüşüvler yaqın eki aftada olmaycaq.
Bu aqta «Qırım birdemligi» cemaat birleşmesiniñ faalleri Facebook saifesinde bildirdi.
«(…) ne yazıq ki, körüşüv olmadı, COVID-19 telükesi bar dep, 2020 senesi martnıñ 16-ndan itibaren kimsege körüşüv izni berilmeycek degen emir keldi. Bu sıñırlav eñ az eki afta devam etecek. Eki afta devamında olarnen körüşip olamaycaqmız. Saba altıdan sekizge qadar bekledik, şimdi bizge haber etildi», – dep tarif etti siyasiy mabüs Marlen Asanovnıñ ömür arqadaşı Ayşe Asanova.
Daa evel advokat Aleksey Ladin, Bağçasaraydaki ekinci «Hizb ut-Tahrir davası» mabüsleriniñ SİZOda keskin nefes virus yuqunçı oldı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
