Rusiyeniñ Rostov-na-Donu şeerindeki Cenübiy arbiy okrugınıñ mahkemesi Bağçasaraydaki ekinci «Hizb ut-Tahrir davasınıñ» oturışuvını imayeniñ muracaatı sebebinden iyülniñ 15-ne avuştırdı. Bu aqta «Qırım birdemligi» cemaat birleşmesi haber etti.
«İmaye, şaatlarnıñ ketmesi kerek olğanından oturışuvnı başqa künge qaldırmağa muracaat ete. Advokat (Emil – QA) Kurbedinov cumaaqşamı künü sorğuğa çekilmesi planlaştırılğan mütehassısnıñ hulâsasını qoşmağa rica ete. Qabaatlayıcı taraf qarşı degil», – dep aytıla haberde.
İyülniñ 13-nde olğan oturışuvda imayeniñ dört şaatından ekisi sözge çıqtı – Qırım Muhtar Cumhuriyetiniñ milletlerara munasebetler ve sürgün etilgen vatandaşlarnıñ işleri komitetiniñ sabıq yolbaşçısı Edem Dudakov, mabüsler Server Mustafayevni şahsen tanığan ve 15-20 yıldan berli Seyran Saliyevni bilgen Yekaterina (Hatice) Mamutova. Musa Tatar ve Mustafa Mustafayev sözge çıqıp yetiştirmedi.
Hatırlatamız, Bağçasaraydaki ekinci «Hizb ut-Tahrir davasınıñ» imaye tarafı 50-den çoq şaatnı ketirmege azır, aralarında Rusiye FSBsiniñ isteginen ekspertiza yapqan mütehassıslar, dinşınas ve tilşınaslar bar.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
