Bağçasaraydaki Han sarayınıñ reberligi Qırım hanlarınıñ «altın odasını» 2020 senesi tamir etip başlamağa istey, dep bildirdi qoruqnıñ baş müdiri Vadim Martınük TASS agentligine.
«Keçirilgen yarış esasında baş hızmetçi teşkilât saylanacaq, onıñ böyle işlerde tecribesi olğan ihtisaslı mütehassıslarnı celp etmege aqqı bar», – dep bildire Martınükniñ aytqanlarını Rusiye haber agentligi.
Müdirniñ malümatına köre, «altın oda» baş korpusnıñ cenübiy binasındaki ekinci qatnıñ obyektlerinen beraber tamir etilmeli.
Qoruqnıñ baş mimarı Rustem Umerov, restavratsiyağa Türkiye ustazları celp etilecek, dep ümüt ete, çünki «olar iş hususiyetlerini bile».
Yarımadanıñ Rusiye akimiyeti Han sarayınıñ beş obyektini, hususan Graf korpusını ve Han aşhanesini tamir ettirmege azırlanğan edi.
İşlerniñ fiyatı 265 mln ruble olmaq kerek edi.
Moskva kontrolindeki Qırım akimiyeti Bağçasaraydaki Han sarayı sekiz obyektiniñ «rekonstruktsiyasını» yapacaq tış hızmetçisiniñ tapıp olamadı.
Qırımnıñ Rusiye yolbaşçısı Sergey Aksenov, Bağçasaraydaki Han sarayınıñ «restavratsiyası» 2021 senesi bitecek, dep tarif etti.
Bağçasaraydaki Hanlar sarayı – qırımtatarlarnıñ tarihınen bağlı eñ meşur müzey, Qırım hanları Geraylarnıñ yaz rezidentsiyasıdır. Müzey kompleksinde saray, garem, hanlar mezarlığı ve cami bar. O, UNESCO dünya mirasınıñ cedveline kirsetilecek namzetler sırasında mevcut.
2016 senesi iyül ayında Qırımnıñ Rusiye medeniy mirasnı qoruv devlet komiteti, Han sarayınıñ «restavratsiya» işlerini keliştirdi. Akimiyet bunı «qazağa qarşı işler» dep adlandırdı.
Qırım Muhtar Cumhuriyetiniñ milletlerara munasebetler ve sürgün etilgen vatandaşlarnıñ işleri komitetiniñ sabıq reisi, qırımlı faal Edem Dudakovnıñ bildirgenine köre, «rekonstruktsiya» vaqtında Hanlar sarayınıñ tahta tosunları yoq etildi: bir qısmı pıçıldı, diger alıp ketirildi. Bundan ğayrı, Dudakovnıñ malümatına köre, restavratsiya işlerini yapqan tış hızmetçi şirket eski kiramet yerine ispan üslübindekini qoymağa planlaştıra.
Kyiv, Rusiye akimiyetiniñ Hanlar sarayında keçirgen «restavratsiyanı» çoq tenqit etken edi. Ukraina medeniyet nazirligi bu işler sebebinden Hanlar sarayınıñ baş korpusı yoq etile bile, dep bildire.
