Bağçasaray suv anbarı yanında mayısnıñ 4-nde qırımtatarlarnıñ ananeviy Hıdırlez bayramı qayd etildi. Beş künden berli onı Qırımnıñ Rusiye akimiyeti teşkil ete – işğalden evel bayramnı Qırımtatar Milliy Meclisi teşkil etken edi.
Qırım.Aqiqat mühbiriniñ bildirgenine köre, şeñlik alanı şeritnen işaretlendi, anda Rusiye gvardiyası ve politsiya hadimleri nevbetçilik yapa edi. Akimiyet teşkil etken bayramlarda olğanı kibi musafirler maden qıdırıcılardan keçti.
Qırımnıñ er bir rayonı çadırlarda öz regionınıñ diqqatqa lâyıq yerlerini taqdim etken edi. Qoyulğan sanada folklor ansamblleriniñ çıqışları oldı.
Hıdırlez – türkiy halqlarnıñ eñ büyük bayramlarından biri. XIX asırda onıñ şeñlikleri üç kün devam ete edi.
Qırım işğalinden evel Hıdırlez Aqmescit – Bağçasaray yolunıñ 25-inci kilometrinde qayd etile edi. Lâkin 2014 senesinden berli qırımtatarlar Hıdırlezni qayd etmey. O vaqıt Qırımnıñ memuriy sıñırında biñlernen insan qırımtatar lideri Mustafa Cemilevni qarşılağan edi, Rusiye akimiyeti onıñ yarımadağa kirişini yasaqlağan edi.
Qırımnıñ ilhaqından soñ Qırımtatar Milliy Meclisiniñ vekilleri yarımadada yapılğan Hıdırlez şeñliklerinde iştirak etmekten vazgeçti. Ondan ğayrı olar, Rusiye tarafından ilhaq etilgen Qırımda bulunğan yurtdaşlarını da böyle şeñliklerde iştirak etmekten vazgeçmege davet ettiler.
Qırımnıñ Rusiye akimiyeti bayram musafirleriniñ sayısı rekordlı – 55 biñden ziyade insan oldı, dep bildirdi. Faqat Meclis reisi Refat Çubarovnıñ aytqanına köre, akimiyetniñ malümatı bayağı qabartıldı, çünki kelgen insanlarnıñ sayısı bir qaç biñden ziyade degil edi.
Rusiye akimiyetiniñ Bağçasarayda teşkil etken Hıdırlez şeñlikleri nasıl ötkerilgenini Qırım.Aqiqat mühbiriniñ fotoresimlerinde körmeñiz mümkün.
Facebook Forum