Bağçasaraydaki Lenin meydanında şeer kününe bağışlanğan bayram tedbirleri olıp keçti. Bunı Qırım.Aqiqat mühbiri bildire.
Şeerniñ rus akimiyeti kontsert, bala attratsionları ve soqaq aşı noqtalarını teşkil etti. Kontsert programması çerçivesinde Qırımdaki Rusiye İç işler nazirliginiñ bölüklerinden biriniñ hadimleri çıqışta bulunıp, yırladı ve yazğan şiirlerini oqudılar.
Haber etilgeni kibi, şeer sakinleri ögünde şeerniñ rus yolbaşçısı Aleksandr Trânov çıqışta bulundı.
«Mında raat olmañız ve er vaqıt mında qaytmağa istemeñiz içün er şey yapacaqmız. Mında yañı-yañı insanlar kelsin», – dep ayttı sanadan Bağçasaray yolbaşçısı.
Bundan ğayrı, toplaşqanlarnıñ ögünde yerli din cemiteniñ vekilleri çıqışta bulunıp, Bağçasaraynı «pravoslavlıqnıñ beşigi» dep adlandırdı.
Şeer kününde tertip-nizamnı Rusiye politsiyası ve Rusiye gvardiyasınıñ hadimleri közetti. Meydannıñ yanında eki arbiy KamAZ tura edi. Qırım.Aqiqat mühbiriniñ esaplağanına köre, şeer künü bayramına 500-700 insan toplaştı.
