Bağçasaray rayonındaki Teberti (Turgenevka) köyü yaqınlarında «Turgenevskaya» agrar şirketiniñ alanlarında lavanda toplamağa başladılar. Şirket hadimlerinden biriniñ Qırım.Aqiqat mühbirine bildirgenine köre, lavanda eki afta devamında toplanacaq.
Toplanğan mahsul tarlağa yaqın çiftlikke ketirile. Anda toplanğan lavandanı boşatuv tehnologik hattı bar.
Aynı vaqıtta er kün lavanda tarlalarına turistler kele. Raatlıq künleri insanlarnıñ sayısı arta.
«Agrofirma Turgenevskaya» sıñırlı mesüliyeti olğan cemiyet 2002 senesi qurulğan edi. İmal faaliyetiniñ esas yönelişi – efir yağ ve ilâc yetiştirmesidir.
Haber etilgeni kibi, Aqyarda Üç Quyu qasabası yanında iyülniñ 2-nde lavanda tarlası yandı.
