Bağçasaray rayonında olğan qazadan sebep dört köy ışıqsız qaldı. Bu aqta «Krımenergo» haber ete. Bu malümatqa köre, saba saat 7-den berli Yañı Sala (Novopolye), Yancu (Putilovka), Marqur (Polâna), Kokluz (Bogatoye üşçelye) köylerinde elektrikler yoq.
Müessise mütehassısları «bozulğan yerni qıdıralar».
Noyabrniñ 14-nde qazağa qarşı donatmalarnıñ işi sebebinden Qırımnıñ şarqında tahminen 104 biñ insan yarım saatqa ışıqsız qaldı.
2016 senesi baarde rus energoköprüniñ üçünci pıtağı işini başlağanına baqmadan, Qırımda yarıq söndürmeleri devam etmekte. 2015 senesi dekabrden başlap Herson vilâyetinde energetik tiremelerniñ bozulğanından soñ, Ukrainadan Qırımğa elektroenergiya berilmey. Şimdilik, Qırım öz generatorları, Rusiye generatorları ve Kuban energoköprüniñ elektrik ağını qullana.
