Bağçasaray rayonınıñ üç köyünde quyular saylaştı – akimiyet
Bağçasaray rayonınıñ Yancu, Ayırgul ve Aromat köylerinde quyulardaki suvnıñ seviyesi eksildi, sakinlerge ketirilgen suv berilecek. Bu aqta rayonnıñ Rusiye memuriyeti haber ete.
“Koylerde merkezleştirilgen suv teminatı yoq ve evelleri de yoq edi. Sakinler mevcud quyulardan suv ile temin oluna. Bu yıl keskin olaraq ortağa çıqqan mesele yağanaqlarnıñ yoqsuzlığı ile bağlıdır”, – "Krım24" telekanalına memuriyette bildirdiler.
Akimiyetniñ malümatına köre, dekabrniñ 17-nden başlap bu köylerge içme suvu cedvel boyunca ketirilecek. Bu üç köyde suv teminatı ile bağlı meseleni al etmek içün 2021 senesi million ruble ayırılması köz tutula eken.
Evel, “Voda Krım” şirketiniñ reberi Vladimir Bajenov, eñ qıyın vaziyet Tav Bardaq köyündedir, dep bildirgen edi.
Noyabrniñ soñunda Qırımnıñ yolbaşçısı Sergey Aksönov kommunal hızmetlerge eñ yaqın ocaq Marsian özeninden köyge suv berilüvi imkânını ögrenmege buyurdı.
Biraz soñra yerli akimiyet, Tav Bardaq köyüne suv Han Eli köyünden berilecek dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
