FSB, Rusiye Fevqulâde vaziyetler nazirligi ve bergi hızmetiniñ hadimleri Bağçasaray rayonınıñ Foti Sala (Nijnâya Golubinka) köyünde qırımtatar faali Nariman Temirkaliyevke ait Tehnik hızmet stantsiyasına (THS) «teşkerüv» yapmağa keldi. Aralarında quvetçiler olğan müessise hadimleri onı «federal qanunlarğa riayet etüv» ve «ekstremist faaliyetine para berüv» ceetinden teşkerdi, dep bildirdi. Bu aqta «Qırım birdemligi» cemaat teşkilâtı Qırım.Aqiqatqa haber etti.
«THS saibi yoq edi, beş hadimi içeri kirdi, ne yapqanları belli degil. Soñra o, avtoserviske keldi, anda teşkerüv qararı berildi, FSB Temirkaliyevniñ faaliyetini baqsın dep prokuraturağa muracaat etken eken. Nariman, Anayasanıñ 51-inci maddesine esaslanıp, bir şey añlatmadı ve çıqmalarını rica etti», – dep aytıla haberde.
Faalniñ birleşmege haber etkenine köre, quvetçiler qararları bar dep, ketmege razı olmadı.
«Soñra farqlı çapçaqlarnıñ fotoresimlerini yapqanlar. Uquq qoruyıcılar anda ne bar dep soradı, Temirkaliyev anda maşina yağları saqlana, dep ayttı. Uquq qoruyıcılarından biri anda patlayıcı kibi bir şey tapıla bile, dep küldi. Soñra qomşularnı soraştırıp ketkenler. Nariman bu teşkerüvni qırımtatarlarnı qorquzuv ve basqı dep saya, halqnı bölip, siyasiy mabüslerge qol tutmaqtan vazgeçmesini isteyler», – dep qoştı «Qırım birdemligi».
Advokat Emil Kurbedinov adiseni izaatlap, «quvetçiler kene basqı yapmağa tırışqanından» emin, dep ayttı. O, «teşkerüv» Temirkaliyevniñ «Qırım birdemliginiñ» faali olmasınen bağlay. Kurbedinov, Bağçasaraydaki «Hizb ut-Tahrir davasınıñ» mabüsi Marlen Asanovnıñ işi de aynı şekilde qapatıldı, dep hatırlattı.
«FSB onıñ işini bastırdı», – dep bildirdi Kurbedinov.
Rusiye quvetçileri, bergi müessiseleri ve Fevqulâde vaziyetler nazirliginiñ resmiy izaatları yoq.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı. Marlen Asanov 19 yıl sert rejimli koloniyada, Memet Belâlov 18 yıl sert rejimli koloniyada ve bir buçuq yıl sıñırlav; Timur İbragimov 17 yıl sert rejimli koloniyada ve bir buçuq yıl sıñırlav; Server Zekiryayev 13 yıl sert rejimli koloniyada; Server Mustafayev 14 yıl sert rejimli koloniyada ve bir yıl sıñırlav; Seyran Saliyev 16 yıl sert rejimli koloniyada ve bir yıl sıñırlav; Edem Smailov 13 yıl sert rejimli koloniyada ve bir yıl sıñırlavğa üküm etildi. Ernes Ametov qabaatsız tanılıp, mahkemede azat etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
