Advokat Nazim Şeyhmambetov Novoçerkaskta 3-nci tahqiqat tevqifhanesinde tutulğan ekinci Bağçasaray «Hizb ut-Tahrir davası»nıñ mabüsi Edem Smailovnı yoqladı. Advokatnıñ malümatına köre, Smailov mahsus blokta kamerada bir özü video nezareti astında tutula.
Bu aqta Şeyhmambetov «Qırım birdemligi» cemaat birleşmesine aytıp berdi.
«Kamerada bir özü olğanı ağır, amma keçken sene çekken adamlarnen outra edi, nefes almasınıñ çaresi yoq edi. Kamerada issi, müdiriyet ile çatışmalar yoq. Amma aynı zamanda, 8 intizam cezası bar olğanı belli oldı. Advokatnıñ fikrince bu, şahsiy işini bozmaq ve oña daa ziyade diqqat çekmek içün yapıla», – dep qayd ettiler birleşmede.
Şeyhmambetovnıñ sözlerine köre, Smailovnıñ «sağlıq alı bir yoruq, amma endi bayağı vaqıt devamında tiş problemleri olğanı içün tiş ekimine yardım istep maracaat ete».
Şimdi o istinaf oturışqa azırlana, dava materiallarınen tanışa.
SİZO müdiriyetniñ ya da Rusin FSİN buñı ait tefsirleri yoq.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı. Marlen Asanov 19 yıl sert rejimli koloniyada, Memet Belâlov 18 yıl sert rejimli koloniyada ve bir buçuq yıl sıñırlav; Timur İbragimov 17 yıl sert rejimli koloniyada ve bir buçuq yıl sıñırlav; Server Zekiryayev 13 yıl sert rejimli koloniyada; Server Mustafayev 14 yıl sert rejimli koloniyada ve bir yıl sıñırlav; Seyran Saliyev 16 yıl sert rejimli koloniyada ve bir yıl sıñırlav; Edem Smailov 13 yıl sert rejimli koloniyada ve bir yıl sıñırlavğa üküm etildi. Ernes Ametov qabaatsız tanılıp, mahkemede azat etildi.
Ukraina prezidenti Volodımır Zelenskıynıñ temsilciligi Bağçasaraydaki ekinci «Hizb ut-Tahrir davasınıñ» ükmüni «arbiy cinayet» dep adlandırdı. Reintegratsiya nazirligi, qırımtatarlarğa qarşı çıqarılğan üküm sebebinden Rusiyege qarşı sanktsiyalarnı sertleştirmege talap etecek, dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
