Link açıqlığı

Saatnıñ esas haberi

Bağçasaray "Hizb ut-Tahrir davası"nıñ iştirakçisini psihiatrik hastahanege qoydılar - advokat


Üçünci "Hizb ut-Tahrir davası"nıñ iştirakçisi Rustem Seytmemetovnı psihiatrik hastahanege qoydılar. O mahkeme psihiatrik ekspertizasını keçe, bunı advokat Nazim Şeyhmambetovğa atıf etip "Qırım birdemligi" teşebbüsi bildire.

"Biz müsterimniñ böyle ekspertizağa yollanılğanına qarşı edik. Birinciden, böyle davalarda bu ekspertiza vacip degildir. Ekinciden, qanun, şahısnıñ ekspertizağa yollanılmasına sebep olmasını talap ete", - añlattı advokat.

Onıñ aytqanına köre, tahqiqatçı böyle teşkeüvniñ sebeplerini bildirmeli. Advokat, müşterisini psihiatrik hastahanege qoymağa sebepler yoq, dep saya.

"Onıñ travmaları yoq edi, o psihiatr ya da narkolog ekimleriniñ nezareti astında olmadı, onıñ içün bunı qanunsız ve sebepsiz sayamız", - tefsir etti Şeyhmambetov.

İmayeci, böyle ekspertizanıñ keçirilüvine "basqı areketi" dey.

Martnıñ 11-nde Rusiye FSB hadimleriniñ teşebbüsinen qırımtatarlarnıñ evlerinde bir sıra tahqiqat tedbiri başlatıldı. Yedi tintüv keçirildi, beş kişi tutuldı: Enver Mustafayev, Seytumer Seytumerov (tarihçı – QA), Osman Seytumerov, Amet Suleymanov, Rustem Seytmemetov. Olarnı FSB bölügine alıp ketkenler.

Onıñ malümatına köre, tutulğanlar Rusiye Ceza kodeksirniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv) qabaatlana.

Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.

Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG