Ekinci Bağçasaray "Hizb ut-Tahrir davası"nıñ iştirakçisi Seyran Saliyev, endi üç afta devamında SİZOnıñ mahsus blikunda tutula. Bunı Facebookta advokatı Mammet Mambetov yazdı.
"Onı, avgust 2-sinde mabüslerniñ apis müddetini uzatqan Qırım Yuqarı mahkemesiniñ keçken oturışından soñ, anda (mahsus blokqa - QA) oturttılar. Seyran emin ki, bunı, o, mahkemede, IV Jeneva şartnamesine köre, onıñ cinaiy taqibatı cinayetçilik sayılğanını aytqanı içün, intiqam. Men de, onıñ imayecisi kibi, bunı bir basqı usulı kibi körem", - yazdı Mambetov.
Avgust 26-sında Şimaliy Kavkaz bölge arbiy mahkemesi, ekinci Bağçasaray "Hizb ut-Tahrir davası" iştirakçileriniñ tevqifini altı ayğa uzattı.Timur İbragimov, Marlen Asanov, Memet Belâlov, Seyran Saliyev, Server Zekiryayev, Ernes Ametov, Server Mustafayev ve Edem Smailov, SİZOda 2020 yılı fevral 13-ünece tutulacaq.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatar, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
.
