Ekinci Bağçasaray "Hizb ut-Tahrir davası"nıñ iştirakcisi Edem Smailov, onıñ şimdiki közlügi bozulğanı sebebinden, onı baqmaq ve közlük alması içün vesiqa bermekni Rostov-na-Donu şeeriniñ SİZO-1 memuriyetine muracaat etti.
Bunı advokat Nazim Şeyhmambetovğa atıf etip "Qırım birdemligi" teşebbüsi bildire.
"Mahkeme oturışı vaqtında Smailov, közlügi bozulğanını aytıp berdi. O Rostov-na-Donu SİZOsınıñ memuriyetine onıñ şimdiki közlügi bozulğanını tasdıqlamaq ve onı baqıp, tuvğanlarına közlük yollamağa razı olmaqnı istep muracaat etti. Çünki SİZo, tibbiy hızmetniñ tasdıqı olmazdan, tuvğanlardan közlükni qabul etmey", - dep qayd etti advokat.
Umumen, advokatnıñ aytqanına köre, şimdilik Smailovnıñ SİZO şaraitine ve sağlıq alına şikâyetleri yoq.
Noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
