Bağçasaray "Hizb ut-Tahrir davası"nıñ iştirakçisi Zevri Abseitovnı bu afta SİZOdan Rostov-na-Donu (Rusiye) şeeriniñ koloniyasına etap ete bileler, dep bildirdi avgust 12-sinde maküm etilgenniñ qadını Fatma Abseitovanıñ sözlerinden "Qırım birdemligi" birleşmesi.
Oña köre, Zevri Abseitov, koloniyağa etap etilecegi aqqında vesiqalarnı aldı.
"Zevri, oña Moskovadan kâğıt keldi, dep bildirdi ve, belki de, bu afta onı bilinmegen yerge etap eterler", - dep yaza Abseitovanıñ sözlerinde "Qırım birdemligi".
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
2018 senesi dekabr ayında Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi.
Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.
İyülniñ 11-nde Rusiye Yuqarı mahkemesi dava mabüsleriniñ ükmüni deñiştirdi. Enver Mamutovğa 16 yıl ve 9 ay apis cezası berildi, Remzi Memetov, Rustem Abiltarov, Zevri Abseitovğa – 8 yıl ve 9 ay.
