Ukraina prezidenti Volodımır Zelenskıy Büyük Britaniya vatandaşları içün vizasız rejimniñ vaqtınca kirsetilüvine dair fermannı imzaladı. Yanvarniñ 29-nda çıqqan vesiqa devlet yolbaşçısınıñ saytında derc etildi, dep haber ete Azatlıq Radiosı.
«Ukraina ve Birleşken Büyük Britaniya ve Şimaliy İrlandiya Qırallığı arasında ortaqlıq esaslarınıñ inkişafı ve ameliy kerçekleştirilüvi maqsadınen emir etem: 2020 senesi yanvarniñ 31-nden başlap 2021 senesi yanvarniñ 30-na qadar Birleşken Büyük Britaniya ve Şimaliy İrlandiya Qırallığınıñ vatandaşları içün Ukrainada 180 kün içinde 90 künden çoq bulunmasa, Ukrainağa vizasız kiriş ve Ukrainadan tranzit keçişini kirsetmege avale etem», – dep aytıla buyruqta.
Ukraina Nazirler şurası buyruqtaki tedbirler almalı. Ferman derc etilgen künü işke tüşürile.
Büyük Britaniya ve Ukraina ile vizasız rejimi olğan Avropa Birligi yanvar ayında Birleşken Qırallıqnıñ Avropa Birliginden çıqış añlaşmasınıñ qabul etilüvini bitire.
Bundan evel Avropa parlamenti Büyük Britaniyanıñ Avropa Birliginden çıqışına reylerniñ ekseriyetinen qoltuttı.
Boris Johnson Londradaki rezidentsiyasında Büyük Britaniyanıñ Avropa Birliginden çıqacağına dair añlaşmanı imzaladı. O, bu vaqianı «fantastik an» dep adlandırdı.
Büyük Britaniya qıraliçesi II Yelizaveta, parlament qabul etken memleketniñ Avropa Birliginden çıqqanına dair qanun leyhasına qoltuttı. Vesiqa qanun küçüni aldı. Oña köre, Büyük Britaniya yanvarniñ 31-nde Londra saatınen 23:00-da Avropa Birligini terk etecek.
