Büyük Britaniya Rusiyeni halqara teşkilâtlarnıñ közeticilerine ilhaq etilgen Qırımğa kirmege izin bermesine çağırıp, bütün ukrain siyasiy mabüslerini azat etmege talap ete.
Bu aqta BM bölügi ve Jenevadaki diger halqara teşkilâtlarnıñ Büyük Britaniya daimiy temsilciliginiñ vekili Ukrainada insan aqları monitoring missiyasınıñ işi esasında yapılğan BM insan aqları Yuqarı komissarı idaresiniñ esabatından soñ bildirdi, dep haber etile Britaniya ükümetiniñ saytında.
«Rusiyeni BM Baş Assambleyasınıñ 73/263 qararına riayet etmegeni içün takbih etip, Rusiyeni halqara monitoring teşkilâtlarına ilhaq etilgen Qırımğa kirmege izin bermesine ve bütün siyasiy mabüslerni acele azat etmesine çağıramız», – dep bildirdi Büyük Britaniyanıñ vekili.
Onıñ bildirgenine köre, Büyük Britaniya 2019 senesi mart ayında Aqmescitte 20-den ziyade qırımtatarınıñ evinde yapılğan tintüvlerni ve apiske aluvlarnı takbih etip, kütleviy haber vastalarınıñ insanlarnı saylap tutulğanı, adaletsiz mahkemeler ve işğal etilgen Qırımdaki işkencelerge dair haberlerine şaşa.
Britaniya vekiliniñ qayd etkenine köre, London Rusiyede tutulğan 70-ten ziyade ukrainalı siyasiy mabüsniñ, hususan acele tibbiy yardımğa muhtac olğan Pavlo Ğrıb ve Edem Bekirovnıñ sağlıq vaziyetinden qasevetlene.
