Rusiye ordusınıñ maddiy-tehnikiy teminatı ile bağlı qıyınlıqlar Keriç köprüniñ bozulmasından soğ keskinleşkeni körünip tura. Bunı Büyük Britaniya Mudafaa naziri öz menbalarına atfı etip Twitter saifesinde haber ete.
"Ukrayinanıñ cenübinde faaliyet köstergen Rusiye quvetleri, Keriç köprüniñ keçirüv qabiliyetiniñ eksilmesini ivaz etmek içün Mariupol vastasınen logistika aqıntısını arttıracaqtır. Çünki Rusiyeniñ Hersondaki bulunuvu kergin olğanı, Qırımdan keçken teminat yolları fenalaşqanı içün Zaporijjâ vilâyetinden keçken yerdeki hattı Rusiye işğaliniñ devamlığı içün kettikçe daa çoq müim ola", - dep yazıla bildirmede.
Britaniya istihbaratı qayd etti ki, Melitopol şeeri teminat yollarınıñ merkezi ve Rusiye aviatsiyasınıñ esas mevcut olğan yeridir.
Oktâbrniñ 8-nde saba Qırım köpründe patlav oldı. Rusiye tahqiqatçılarınıñ versiyasına köre, yük maşinası patladı. Neticede eki maşina yolu zarar kördi, patlav sebebinden ya da aynı vaqıtta köpürniñ tren yolundan ketken yük treni yanıp başladı.
Rusiye prezidenti Vladimir Putin bu patlavnı «terakt» dep adlandırdı, onıñ icracıları ve sımarış etkenler Ukrayina mahsus hızmetleri ola. Rusiye Tahqiqat komiteti Rusiye Ceza kodeksiniñ 205-inci maddesine («Terrorizm») istinaden cinaiy dava açtı.
Ukrayına resmiy şahısları izaat bermey. Prezident ofisiniñ yolbaşçısı Mıhaylo Podolâk «Putinniñ şahsiy leyhasını» patlatuv – rusiyelilerniñ işi ve arbiy reberlikniñ FSBge qarşı ücümi ola, dep ayttı.
The New York Times gazetası «Ukrayinska pravda», UNIAN ve Washington Posttan soñ Ukrayina memurınıñ malümatına esaslanıp bildirgenine köre, ücümni Ukrayina mahsus hızmetleri teşkil etti. Olarnıñ versiyası – yük maşinasını patlatuvdır.
Resmiy şekilde köpürdeki patlav içün kimse mesüliyetini tanımadı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
