Rusiye “Hizb ut-Tahrir davası” boyunca apis cezasına mahküm etilgen Emir-Usein Kuku ve diger ukrain siyasiy mabüslerini azat etmek kerek, dep qayd etti Büyük Britaniyanıñ Ukrainadki elçisi Melinda Simmons.
Fevralnıñ 11-nde Yalta “Hizb ut-Tahrir davası” mabüsleriniñ evlerinde tintüvler keçirilgen soñ yaqalanılmalarından 5 yıl keçti. Olarnıñ arasında qırımtatar aq-uquq qoruyıcı Emir-Usein Kuku da edi.
"Emir-Usein Kuku Rusiye tarafından qanunsız apis etilgen eñ azından 109 ukrain siyasiy mabüsinden biridir. Başqaları kibi, yaramay şaraitte tutula ve oña tibiy yardım kösterilmey. Böyle devam ete bilmez. Rusiyeni Kukunı ve diger ukrain siyasiy mabüslerini deral azat etmege çağıram", – dep yazdı Simmons.
Britaniya parlamentiniñ azası Vendi Morton da qırımtatarlarnıñ taqip etilüvini toqtatmağa çağırdı.
"Qayğılı kün bugün: qırımtatar insan aqları qoruyıcısı Emir-Usein Kuku uydurılğan sebeplerden endi beş yıl Rusiye apishanesinde tutula. Rusiye qırımtatarlarnıñ taqip etilmesini toqtatmaq ve Kukunı azat etmek kerek", – dep yazdı Morton.
“Memorial” uquq qoruyıcı merkez Kukunı siyasiy mabüs tanıdı, Amnesty International uquq qoruyıcı teşkilâtı ise oña vicdan mabüsi dey.
Yaltalı aq qorçalayıcı, Qırım insan aqları bağ gruppasınıñ azası. 2014 senesinden başlap semetdeşleriniñ aqlarını qorçalap, Rusiyeniñ Qırım işğalinden soñ hırsızlanğan qırımlılarnı qıdırmağa yardım etken edi. 2015 senesi Rusiye quvetçileri onı tutıp köteklegenler, dep bildirdi. Evinde tintüv keçirildi, tehnika ve Rusiyede yasaqlanmağan diniy edebiyat alındı. Emir-Usein Kukunı Rusiye Ceza kodeksiniñ 282-nci maddesine (nefret ve duşmanlıqnı doğuruv) istinaden ve eki FSB hadimine ücüm etkeninde qabaatlamağa tırışqan ediler.
Neticede aq qorçalayıcı 2016 senesi «Hizb ut-Tahrirde» iştirak etkeninde ve akimiyetni zapt etmege azırlanğanında qabaatlanıp tutuldı.
2016 senesi fevralniñ 11-nden berli apiste buluna. 2018 senesi iyün ayında Emir-Usein Kuku siyasiy mabüslerniñ azat etilüvini talap etip, 24 kün açlıq tuttı.
12 yılğa üküm etildi, azatlığı 1 yılğa sıñırlandı.
Azatlıqta ömür arqadaşı, qızı ve oğlu qala.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
