Büyük Britaniya baş naziri Boris Johnson koronavirusqa oğradı, onıñ koronavirus yuqunçınıñ yengil alâmetleri qayd etildi. Bu aqta o, Twitterde bildirdi.
55 yaşında siyasetçi Londradaki Downing Street rezidentsiyasında özüni tecrit etmege ve ükümetni uzaqtan idare etmege planlaştıra, dep bildire Azatlıq Radiosı.
- Johnson, diagnozı tasdıqlanğan G20 memleketleriniñ ilk dünya lideri oldı. Daa evel berilgen malümatqa köre, koronavirus testi Braziliya prezidenti Jair Bolsonaroda müsbet çıqtı, amma tekrar yapılğan test menfiy netice kösterdi.
- Monako printsi II Albert koronavirusqa oğradı. Daa soñra onıñnen körüşken Britaniya şahzadesi Charlesde de hastalıq qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
