Qırımtatar halqınıñ lideri Mustafa Cemilev ve Qırımtatar Milliy Meclisiniñ reisi Refat Çubarov kerçekleştirgen Romaniya ziyareti vaqtında Rusiye işğal etken Qırımdaki vaziyet aqqında tarif ettiler.
Ukrainanıñ Romaniya elçihanesi bildirgenine köre, Romaniya Tış işler nazirliginde, Romaniya ükümetiniñ etnikara munasebetler departamentinde körüşüvler keçirildi.
«İşbu körüşüvler vaqtında qırımtatar halqınıñ vekilleri Rusiye işğal etken Qırım Muhtar Cumhuriyetindeki vaziyet, bütün regionnı telükege oğratqan askeriyleştirüv, işğal altındaki yarımadada insan aqlarını teminlev vaziyeti aqqında malümat berdi», – dep aytıla haberde.
Ukraina elçihanesiniñ malümatına köre, Romaniya tarafı Ukraina mustaqilligi, suvereniteti ve topraq bütünligine halqara seviyede tanılğan sıñırlarda qoltutqanını bildirdi. Bunıñ delili BM Baş Assambleyasınıñ bir sıra qararğa rey bermeknen beraber, müelliflerinden biri olması da ola.
Tünevin Qırımtatar Milliy Meclisiniñ reisi Refat Çubarov, Bükreş ava limanında Romaniya sıñırcıları tarafından üç saat tutulğanını bildirdi. Çubarovnıñ aytqanına köre, o, «Rusiye mahsus hızmetleriniñ zeerli qarmalavuçları onı Romaniyada tutmağa tırışacaqlarını beklemedi».
Çubarovnıñ qayd etkenine köre, mezkür meselege Ukrainanıñ Romaniya elçisi ve konsulı kirişmege mecbur oldılar.
Ukraina ve Romaniya diplomatik müessiseleriniñ vekilleri bunı resmiy şekilde daa izaatlamadı.
