Rusiyeli faal Yuliya Lorents işğal etilgen Qırımda mahküm etilgen ve Rusiyeniñ Tver vilâyetindeki Torjok koloniyasında tutulğan ukrainalı faal Volodımır Baluhtan alğan mektüpni derc etti.
Lorentsniñ aytqanına köre, o, aprelniñ 23-nde Baluhqa mektüp yollap, aprelniñ 25-nde cevap aldı.
Rusiyeli faal Baluhnıñ cevabını tarif ete: «Sıcaq urbasız seyahat aqqında aytsaq, bu koloniyanıñ özünde bulunmaqtan daa komfortlı oldı. Bundan evel böyle bir suvuqta daa olmağan edim. Meni 3 aftadan berli ceza izolâtorında tutalar, ve başta qızdıruv qorasını quçaqlap, tenniñ bir qısmını qızdırmağa mümkün olsa edi, 16-ndan itibaren qızdıruv yoq…».
Baluhnıñ aytqanına köre, «soñki bir buçuq ay devamında yalıñız ötmek aşağan (ceza izolâtorında tışarıdan ketirilgen aşlarnı aşamaq yasaq) sıcaq sevgen cenüpli biri içün bu bir sınav, gece bile qolay olmay».
Bu sene aprel ayında Qırımnıñ Yuqarı mahkemesi Baluhnıñ SİZOda keçirgen vaqtını bir kün yerine bir buçuq kün olaraq saymamağa qarar aldı. Qırım aq qorçalayıcı gruppası Rusiye Ceza kodeksiniñ 72-nci maddesiniñ 3-ünci qısmına köre şahısnıñ nezaret altında tutuluvı umumiy rejimli tüzetüv koloniyasında ceza çeküv müddetine bir kün bir buçuq kün olaraq sayılmaqta, dep hatırlattı.
Kreml kontrolindeki Qırım Yuqarı mahkemesi ukrain faali Volodımır Baluhnıñ imayesine cezası müddetiniñ ğayrıdan baqıluv muracaatını red etti. Kreml nezaretindeki Qırım Yuqarı mahkemesi Volodımır Baluhnı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.
2018 senesi martnıñ 19-nda Volodımır Baluh açlıqqa başlağan edi. Bir aydan ziyade bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi. Daa soñra mahküm etilgen ukrain faali açlıqnı vaqtınca toqtatmağa qarar aldı.
Advokatlarnıñ malümatına köre, 200 künden çoq açlıq tutqan Baluhnıñ ülser ve pankreatit şübesi peyda oldı.
FSB, Volodımır Baluhnı 2016 senesi dekabrniñ 8-nde tuttı. FSB hadimleri Volodımır Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
«Memorial» aq qorçalayıcı merkezi Volodımır Baluhnı siyasiy mabüs olaraq tanıdı. Aq qorçalayıcılarnıñ fikirince, faalni taqip etüv sebebi evinde tiklegen «Sema Yüzü Qaramanları soq., 18» levhası olğan.
