Mariupolde Rusiye ordusı «Azovstal» zavodını qoruğan Ukraina arbiylerine qarşı fosfor snarâdlarını qullandı. Bu aqta mayısnıñ 16-nda Ukraina Yuqarı Radasınıñ insan aqları vekâletlisi Lüdmila Denisova bildirdi.
«Rusiye işğalcileri «Azovstalde» Ukraina imayecilerine qarşı fosfor bombalarını qullandı. Raşistler 9M22S yaqqan snarâdlar qullanıldı, dep ayta. Tahminen 2-2,5 biñ derece yanma derecesidir. Yanğınnı söndürmege aman-aman imkânsız», – dep haber etti ombudsman.
Onıñ aytqanına köre, Rusiye ordusında 9M22S snarâdı «Grad» toplu ateş reaktiv sisteması içün esas ola ve «kütleviy yanğınlarnı çıqarmaq içün» kerek.
Bir kün evelsi saba Mariupol şeer yolbaşçısınıñ muavini Petro Andryuşçenko Rusiye ordusı Mariupol imayecilerine qarşı «yaqqan ya da fosfor bombalarını» qullandı, dep bildirdi.
Soñra Baş prokurornıñ ofisi Rusiye Federatsiyası tarafından «Azovstaldeki» askerlerge qarşı yasaqlanğan yaqqan snarâdlarnıñ qullanıluvına dair haberlerden soñ tahqiqat aqqında bildirdi.
«Azovstal» zavodı – Mariupolde Ukraina ordu mudafaasınıñ soñki qalesidir. Şeerniñ büyük qısmı Rusiye arbiyleri tarafından kontrol etile. Ukraina, arbiyleriniñ tahliyesine irişmege tırışıp, olarnı cenk bitkenine qadar üçünci memleketke yollamağa teklif ete. Böyle tahliyeni temin etmek teklifi Türkiye tarafından yapılğan edi. Rusiye, Ukraina arbiyleri esirlikke teslim olsun, dep israr etti. Şimdi ağır yaralanğanlarnıñ tahliyesi aqqında muzakereler keçe – rusiyeli esirlerge almaştırmaq içün.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
