Rusiye ordusı tarafından sarıp alınğanına baqmadan, Ukraina arbiyleri üç aydan berli mudafaa etken Donetsk vilâyetiniñ Mariupol şeerindeki «Azovstal» kombinatından 60 insannıñ tahliye etilmesi içün muzakereler keçire. Bu aqta mayısnıñ 14-nde baş nazir muavini – Ukrainanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuk bildirdi.
«Anda bir qaç yüz yaralanğan kişi bar, birinciden olarnı qurtarmaq kerek, çünki episini birden tahliye etmege rusiyeliler razı olmay. Yani başta ağır yaralanğanlar ve tibbiyet hadimleri, 60 insan bar», – dep haber etti Vereşçuk.
Bundan evel Vereşçuk «Azovstalden» 38 ağır yaralanğan arbiyniñ tahliyesinen bağlı muzakereler aqqında bildirgen edi. Mayısnıñ 13-nde «muzakereler pek qıyın», dep qayd etti.
Mayısnıñ 11-nde Papa Mariupolde blok etilgen «Azov» askerleriniñ ömür arqadaşları – Yekaterina Prokopenko ve Yuliya Fedosük ile körüşti. Olar «Azovstal» zavodında qalğan yaralanğan askerlerniñ fotoresimlerini berip, olarğa ölmemege yardım etmege rica etti.
Ukraina prezidenti Volodımır Zelenskıy şimdi Ukrainanıñ Mariupolni cenk yolunen bloktan çıqarmağa imkânı yoq, dep bildirdi. O, Kyiv muzakereler yolunen tahliye olmasına irişmege tırışa, dep qoştı. Moskva arbiyler içün gumanitar ayatnı muzakere etmege istemey. Ukraina muzakerelerge Türkiye, İsrail, İsviçre, Frenkistan, BM ve Qızıl Haç Halqara komitetini celp etti.
Mariupol fevralniñ 24-nde başlağan büyük istilânıñ ilk künleri Rusiye ordusı tarafından sarıp alındı. Ukraina bölükleri üç aydan berli tirene.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
