Mariupolniñ «Azovstal» zavodından Zaporijjâğa 156 insan tahliye etildi, dep bildirdi mayısnıñ 3-nde Mariupol şeer şurasınıñ matbuat hızmeti Ukrainanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuknıñ malümatına esaslanıp.
«Azovstalden» tahliye etilgen insanlar Zaporijjâğa kelip çıqtı. Anda olarğa kerekli yardım kösterile. Reintegratsiya naziri İrına Vereşçuknıñ aytqanına köre, umumen 156 insan tahliye etildi. O, daa bir qaç yüz kişi müessisede qala, dep qoştı», – dep aytıla şeer memuriyetiniñ beyanatında.
Ukrainanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuk mayısnıñ 3-nde brifingde Mariupolde on biñlernen insan qala, dep bildirdi.
«İhtiyacı olğan ve qurtulmağa istegen er kesni almalımız. On biñlernen insan bar. Mariupolde on biñlernen qadın, bala ve esli-başlı insanlar qala. Anda ilâc, suv ve bağ yoq», – dedi o.
Memurnıñ fikirince, vatandaşlarnıñ bir qısmı çıqarılğan soñ Rusiye «Azovstal» ücümine yañıdan başladı.
«Bu olarnıñ planı edi: vatandaşlarnıñ bir qısmına çıqmağa imkân berip, bombardımannı devam ettirmek. Lâkin anda vatandaşlar qala, andan çıqıp yetiştirmegen insanlar bar, çünki manialar o qadar ağır edi ki, eki kün içinde olarnı kötermege çareleri yoq. Gumanitar operatsiyağa devam etmeli, «Azovstalnen» hususan», – dep çağırdı Vereşçuk.
Bugün Birleşken Milletler Ukraina temsilcisi Osnat Lubrani vatandaşlarnıñ Mariupolden çıquv operatsiyası muvafaqiyetli oldı, dep bildirdi.
Mayısnıñ 1-nde Ukraina prezidenti Volodımır Zelenskıy vatandaşlar Maruipoldeki «Azovstalden» tahliye etile, dep bildirdi. Birinci gruppa – tahminen 100 insan – Ukraina ükümeti kontrol etken yerge BM vekillerinen beraber kete.
Mayısnıñ 3-nde Milliy telükesizlik ve mudafaa şurası yanındaki Strategik alâqalar merkezi Rusiye ordusı Mariupoldeki «Azovstal» zavodınıñ ücümini yañıdan başlattı, dep bildirdi.
Mariupol şeer yolbaşçısı Vadim Boyçenkonıñ malümatına köre, 200-den çoq vatandaş alâ daa «Azovstal» zavodında qala.
Mariupol fevralniñ 24-nde başlağan büyük istilânıñ ilk künleri Rusiye ordusı tarafından sarıp alındı. Ukraina bölükleri eki aydan berli tirene. Al-azırda şeerden vatandaşlarnı ve yaralanğan arbiylerni çıqarmağa tırışalar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
