"Azov" polkunıñ komandanı Denis Prokopenko yazılı video muracaatında Mariupoldeki "Azovstal" zavodından tahliye esnası aqqında aytıp berdi.
Prokopenko, Ukrayinanıñ arbiy reberligi Mariupolniñ imayecilerine şeerniñ mudafaasını toqtatmaq ve öz ömrüni ve sağlığını qurtarmağa emir etkenini qayd etti.
"Ağır uruşlarğa, ertaraflı mudafaağa ve teminat yoqsuzlığına baqmadan, biz daima bizim içün eñ müim üç şartnı qayd ete edik: vatandaşlar, yaralılar ve ölüler. Vatandaşlarnı tahliye etip oldıq, ağır yaralılarğa kerekli yardım kösterildi, olarnı tahliye etip oldıq, soñradan da olar deñiştirilecek. Ölgen qaramanlarğa kelgende, esnas devam etmekte ve ümüt etem ki, eñ yaqın zamanda tuvğanlar ve bütün Ukrayina öz askerlerini şeref ile defin etip olacaq", - dedi polknıñ komandanı.
Tünevin «Azov» polkunıñ komandan muavini Svâtoslav Palamar (tahallüsi «Kalina») polknıñ komandanlığı Mariupoldeki «Azovstal» zavodında qalmağa devam ete, dep bildirdi.
Ukrayina prezidenti Volodımır Zelenskıy mayısnıñ 18-nde Mariupoldeki «Azovstal» zavodından tahliye tedbirleri devam ete, dep qayd etti.
Ukrayina Mudafaa naziriniñ muavini Ğanna Malâr mayısnıñ 17-nde gece Ukrayina arbiyleri «Azovstal» zavodından tahliye etip başlağanını tasdıqladı. Onıñ aytqanına köre, ağır yaralanğan 53 arbiy işğal etilgen Novoazovsk tibbiy müessiselerine tahliye etildi. Daa 211 insan gumanitar ayattan Yelenovkağa ketirildi.
Mayısnıñ 16-nda aqşam «Azov» polkunıñ komandanı Denis Prokopenko Mariupol imayecilerini ayatlarını qorumaq içün emirni yerine ketirdi, dep bildirdi. Angi emir aqqında aytılğanını añlatmadı. Tek Mariupol garnizonınıñ arbiyleri 82 kün devamında «duşmannıñ büyük küçlerini özüne çekti», dep ayttı. Ve «yüksek arbiy komandanlıqnıñ» «tasdıqlanğan qararını» yerine ketireler, dep qayd etti.
Prezident Volodımır Zelenskıy Ukrayina Mariupolniñ blokunı cenk yolunen toqtatamay, dep aytqan edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
