Ukrayinanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuk, Azovstalden tahliye etilgen ağır yaralı askerlerniñ vaziyeti stabilleşken soñ olar Rusiye arbiy esirleri ile deñiştirilecekler, dep bildirdi.
"Azovstal: gumanitar ameliyat devam ete. İnsanlarnıñ ayatını qurtarmaq içün keçken kün yaralı 52 bizim ağır yaralı arbiyimiz tahliye etildi. Vaziyetleri stabilleşken soñ biz olarnı Rusiye arbiyleri ile deñiştirecekmiz", - dep yazdı o.
Onıñ qayd etkeni kibi, gumanitar ameliyatnıñ nevbetteki basamaqları üşçerinde iş alıp barıla.
Mayısnıñ 17-nde gece saatlarından Ukrayina Mudafaa naziriniñ muavini Ganna Malâr "Azovstal" zavodından ukrayin askerleriniñ tahliye etilmesi başlanğanını bildirdi. Episi olıp "Azovstal"ni 264 arbiy tekr etti, olardan 50 yaralı.
«Azovstal» zavodı – Mariupolde Ukraina ordu mudafaasınıñ soñki qalesidir. Şeerniñ büyük qısmı Rusiye arbiyleri tarafından kontrol etile. Ukraina, arbiyleriniñ tahliyesine irişmege tırışıp, olarnı cenk bitkenine qadar üçünci memleketke yollamağa teklif ete. Böyle tahliyeni temin etmek teklifi Türkiye tarafından yapılğan edi. Rusiye, Ukraina arbiyleri esirlikke teslim olsun, dep israr etti. Şimdi ağır yaralanğanlarnıñ tahliyesi aqqında muzakereler keçe – rusiyeli esirlerge almaştırmaq içün.
Mariupol fevralniñ 24-nde başlağan büyük istilânıñ ilk künleri Rusiye ordusı tarafından sarıp alındı. Ukrayina bölükleri üç aydan berli tirene.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
