"Azovstal" zavodında ekim kibi yaralılarğa yardım etken qırımtatar Türkiye akimiyetine muracaat etip, zavodnıñ territoriyasında blok etilgen arbiy ve vatandaşlarnıñ tahliyesine yardım etmesini istedi. Muvafıq muracaatnı öz Instagram saifesine yerleştirdi.
"Cenkniñ bugün angi künü olğanını hatırlamayım. Adamlar öle, bazıları qurşunlardan, bazıları açlıqtan, yaralanğanlar ilâclarnıñ yoqsuzlığından, yaramay şaraitten. Vaqtımız yoq, yarın olacaqmı yoqmı bilmeyim. Men qırımtatarım, Geraylar evlâdım, musulmanım. İşğalden evel tibbiyetni ögrendim. Şimdi "Azovstal" zavodında yaralanğanlarğa tibbiy yardım kösterem. Bu cenk başlamazdan evel ölüm ne olğanını bilmedim. Acele yardım maşnasında çalıştım. Daima elimden kelgenine qadar adamlarğa yardım ete edim. Amma mında, 2022 senesinde, insanlarnıñ irinli yaralardan, antibiotikler olmağanından ellerim üstünde ölgenlerine baqmağa maña ağır. Biz daima avadan, deñizden ve qaradan bombalanamız. Bütün adamlarnıñ, şu cümleden arbiylerniñ "Azovstal" zavodınıñ meydanından çıqarılması protsedurasına riayet etmeñizge çağıram. Bu deşetni toqtatıñız", - dep yazdı ekim.
Aynı zamanda ekim adını aytmadı. Türkiye akimiyetiniñ resmiy cevabı şimdilik yoq.
Evel, BMT ve Halqara Qızıl Haç komitetiniñ iştiragi ile tahliyeniñ nevbetteki basamağında 500-ge yaqın Mariupol sakini tahliye etilip oldı, dep haber ete Ukrayina Prezidenti ofisiniñ başı Andriy Yermak.
Mariupol fevralniñ 24-nde başlağan büyük istilânıñ ilk künleri Rusiye ordusı tarafından sarıp alındı. Ukraina bölükleri eki aydan berli tirene. Al-azırda şeerden vatandaşlarnı ve yaralanğan arbiylerni çıqarmağa tırışalar.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
