«Azov» polku Rusiye ordusınıñ ava darbeleri ve ücüm ıntıluvlarına baqmadan, Ukraina askerleri Mariupoldeki «Azovstalni» mudafaa etmege devam ete.
«İstilâcı memleketniñ 80 künlik ücümi devamında işğalci Mariupol imayecilerine avadan darbe endire, ağır top ve tanklarnı qullana. Ukraina mevzilerine ücüm etmek içün çoq sayıda piyade askerler qullanıla», – dep aytıla polknıñ Telegramdaki haberinde.
«Azov» askerleri vaziyet kergin olsa da, «Ukraina arbiyleri büyük küç sarf etip, imayecilerni yarıp keçüv ıntıluvlarına tirene ve duşmannıñ ordusını kirsetmey», dep qayd ete.
Ukraina akimiyetiniñ soñki malümatına köre, Kyiv Donetsk vilâyetiniñ Mariupol şeerindeki «Azovstalden» 60 insannı tahliye etmek içün muzakere keçire.
Mayısnıñ 11-nde Papa Mariupolde blok etilgen «Azov» askerleriniñ ömür arqadaşları – Yekaterina Prokopenko ve Yuliya Fedosük ile körüşti. Olar «Azovstal» zavodında qalğan yaralanğan askerlerniñ fotoresimlerini berip, olarğa ölmemege yardım etmege rica etti.
Ukraina prezidenti Volodımır Zelenskıy şimdi Ukrainanıñ Mariupolni cenk yolunen bloktan çıqarmağa imkânı yoq, dep bildirdi. O, Kyiv muzakereler yolunen tahliye olmasına irişmege tırışa, dep qoştı. Moskva arbiyler içün gumanitar ayatnı muzakere etmege istemey. Ukraina muzakerelerge Türkiye, İsrail, İsviçre, Frenkistan, BM ve Qızıl Haç Halqara komitetini celp etti.
Mariupol fevralniñ 24-nde başlağan büyük istilânıñ ilk künleri Rusiye ordusı tarafından sarıp alındı. Ukraina bölükleri üç aydan berli tirene.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
