Rusiye mahkemesi tarafından mahküm etilgen qırımlı Aziz Ahtemov Qırımdan Krasnoyarsk ülkesiniñ Yeniseysk №2 apishanesine aman-aman 40 kün etap etildi. Bu aqta «Qırım birdemligi» cemaat birleşmesi apayı Adile Ahtemovanıñ malümatına esaslanıp haber ete.
Berilgen malümatqa köre, Aziz Ahtemov noyabrniñ 19-nda ömür arqadaşınen bağlanıp oldı.
«Yol uzun ve qıyın edi. Saratovğa kelgen soñ pek suvuq oldı. Anda ve Çelâbinskte gece kurtkada yuqlay edim. Çelâbinskte üç künlik aş berile edi. Bütün aşlar domuz etli edi. Yolda tek galeta aşamağa mecbur edim. Amma Allahqa şükür, yardım etken insanlar bar edi», – dep tarif etti Aziz Ahtemov ömür arqadaşına.
Azizniñ bildirgenine köre, bir aftadan berli karantinde buluna, kamerağa daa almadılar.
Oktâbrniñ 2-nde Nariman Celâl ve ağa-qardaş Ahtemovlar Aqmescitteki SİZO-2-den alındı ve Rusiye apishanelerine etap etildi.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı. Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
