Azerbaycan ve Ermenistan sıñırında iyülniñ 16-nda saba uruşlar devam ete. Taraflar bir-birini ücüm yapqanında ve köylerge ateş açqanında qabaatlay, dep bildire Azatlıq Radiosı.
Ermenistan ordusı şimaliy-şarqiy Tavuş vilâyetiniñ sıñırında noqtalardan birine kerçekleştirilecek olğan ücümge yol bermedi, dep bildire.
«Şiddetli uruş vaqtında duşmanğa qarşılıq kösterildi, o zarar kördi», – dep bildirdi Ermenistan Mudafaa nazirliginiñ matbuat kâtibi Şuşan Stepanân. Onıñ aytqanına köre, Azerbaycan ordusı eki ermeni köyüne mayın atıcı ve gaubitsalardan ateş açtı.
Ermenistan Mudafaa nazirliginiñ malümatına köre, yerli saatnen 9:00-da bir ermeni askeri zarar körmedi.
Tavuş vilâyetiniñ valisi Gayk Çobanân Azatlıq Radiosınıñ Ermeni hızmetine izaat berip, açılğan ateş neticesinde vatandaşlar zarar körmedi, amma evler ve infrastruktura obyektleri zarar kördi, dep bildirdi.
Azerbaycan Mudafaa nazirligi ise Ermenistan küçlerini Azerbaycan ordusına ücüm etkeninde ve sıñırdaki Tavuş rayonınıñ köylerine ateş açqanında qabaatladı. Başqa bir malümat berilmedi.
Azerbaycan ve Ermenistan sıñırındaki uruşlar iyülniñ 12-nde başlandı. Taraflar bir-birini vaziyetni kerginleşkeninde qabaatlay. Bir qaç kün içinde eki taraftan da eñ az 15 asker elâk oldı.
Azerbaycan ve Ermenistan orduları arasında soñki büyük silâlı zıddiyet 2016 senesi aprel ayında Dağlıq Qarabağda oldı. Eki tarafta da onlarnen asker elâk oldı ya da yaralandı. Ermenistan ve Azerbaycan 1992 senesinden berli cenk vaziyetinde buluna.
