Dekabrniñ 13-nde saat 18:00-da Azatlıq Radiosınıñ YouTube kanalında «Sessiz sürgünlik» vesiqalı filmi taqdim etilecek. Levha Rusiye akimiyetiniñ basqısı altında tuvğan yarımadasını terk etmege mecbur olğan qırımtatar qorantaları aqqında tarif ete.
Müellifleri 7 ikâyeni tarif etti. İşğal etilgen Qırımda Rusiye uquq qoruyıcıları taqip etken insanlar, yarımada zapt etilgen soñ ketmege mecbur olğanlar ve Rusiyeniñ Ukrayınağa qarşı büyük istilâsından soñ Rusiye ordusına oğramamaq içün qaçmağa mecbur olğanlar kösterildi.
«Elinde celpnamenen qaçmaq, dört balañnen sıfırdan yaşayış qurmaq, Ukrayına Qırımı oğrunda küreşmek, cenkleşmek, Azovstal ve Olenivkada sağ qalmaq nedir?» – bu suallerniñ cevaplarını film müellifleri Anjelika Rudenko ve Dmitriy Culay qıdırğanlar.
«Bu ikâyeni tarif etmek kerek. Qırım.Aqiqat olmasa, 2023 senesiniñ qırımtatar sürgünligini başqa kim aydınlatacaq?», – dep ayta film müellifi Anjelika Rudenko.
Çekimler Poloniya, Belçika, Almaniya, Türkiye ve Qırımda oldı. Filmde qaramanlarnıñ şahsiy arhivlerinden levhalar kösterildi. İnsanlarnen ikâyelerini tarif etmek içün añlaşmaq eñ zoru oldı, dep ayta film prodüseri Elvina Seitbullayeva.
«Filmniñ bütün qaramanlarını tanıyım. Olarnıñ yaşağanlarını sen de yaşaysıñ. Endi kördiñ, oqudıq sanki, amma olar tarif etkende kene qasevetlenesiñ. Eñ qıyını bu oldı. Diger taraftan, ikâyelerini bizge tarif etkenlerine quvandıq», – dep tarif etti Seitbullayeva.
Seyirciler içün yañı ve beklenmegen çoq şey olacaq, dep qayd ete Rudenko. «İnsanlar şokta olacaq, dep tüşünem. Hatıralar siline. Biz ise işğalniñ 10 yılında olğan ikâyeni hatırlattıq», – dep ayttı o.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
