Cumaertesi künü, iyünniñ 26-nda qırımtatarlar Milliy Bayraq kününi qayd eteler. Ukrainada memurlar ve siyasetçiler qırımtatarlarnı Bayraq kününen hayırladılar.
Qırımtatar Milliy Meclis reisi Refat Çubarov öz Facebook saifesinde yazdı: «Hreşçatık ve onıñ civarındaki soqaqlar devlet ve qırımtatar bayraqlarınen yaraştırılğan. Qırım bu Ukrainadır! Milliy Bayraq künü hayırlı olsun!»
Ukraina Yuqarı Radasınıñ insan aqları vekâletlisi Lüdmila Denisova da Facebook saifesinde qırımtatarlarnı hayırladı: «Bugün Qırımtatar Milily Bayraq Künü –qırımtatarlarnıñ azatlıq oğrundaki küreşiniñ timsali. Eminim ki, arzumız eñ yaqın vaqıtta kerçekleşir – mustaqil memleketniñ eki bayrağı ukrain Qırımında kene yelpireycek».
QMC ve Aqyar şeeri prokuraturasınıñ Facebook saifesinde de qırımtatarlarnı hayırladılar: «İyünniñ 26 – Qırımtatar Milliy Bayraq Künü. Serbest Qırım olmadan bütün ve mustaqil Ukraina yoq ve yalıñız beraberlikte ğayret etsek, yarımadanıñ üzerinde Ukraina ve qırımtatar bayraqları yelpireycek».
Ukrainanıñ 5-nci prezidenti Petro Poroşenko öz Facebook saifesinde böyle yazdı: «Bu sene Qırımtatar Milliy Bayraq Künü başqa. Tam otuz yıl evel Birinci Qurultay uzun müddet dvem etken teneffüsten soñ öz işini devam etti. O zaman qırımtatar bayrağı da yañartıldı. Bu yıllar içinde mavı veten üstündeki tamğa küreş, sadıqlıq ve sevgi sözleriniñ sinonimi oldı. Türlü millitlerden olğan ukrainlerni azatlıq degerlikleri ve öz evlerinden, Ukraina Qırımında tınç yaşamaq aqqı etrafından birleştirgen bir timsal oldı. Qırım bu Ukrainadır!»
Vinnitsa sakinleri balaban qırımtatar bayrağı üzerinde öz yazılarını qaldırdı. Tedbir Qırımtatar halqı Qurultayınıñ faaliyetiniñ 30-ncı yıldönümi ve qırımtatar Milily Bayraq künü munasebeti ile Bütün Ukraina aktsiyası çerçivesinde olıp keçti.
Bundan daa evel qırım sakinlerine öz tileklerini Kyiv, Lviv, Dnipro sakinleri yazdı.
«Evde körüşmek üzre»: Kyivde qırımtatar bayrağında qırımlılar içün tilekler yazıldı (fotoresim)
Kyivde Yuqarı Radanıñ binası ögünde faaller qırımtatar halqınıñ bayrağını açtı, istegenler, hususan deputat ve yardımcıları, Qırım sakinleri içün tileklerini qaldırdı.
Qırımtatar bayraq kününde, iyünniñ 26-nda, onı Qırım ve esas Ukrainanıñ memuriy sıñırından yarımadağa uçurmağa planlaştıralar.
Bayraq Donetsk vilâyetinde tikildi, andan Kyivge ketirildi. İyünniñ 15-nde aqşam bayraqnı Lvivge yollaycaqlar, iyünniñ 16-nda ise Taras Şevçenkonıñ abidesi yanındaki meydanda açacaqlar. İstegen er kes tilegini qaldıracaq. Andan bayraq Odesağa ketecek.
Qırımtatar bayraq künü
Er yıl iyünniñ 26-nda qırımtatarlar Milliy bayraq kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci Qırımtatar Milliy Qurultayınıñ birinci künü saylânğan edi.
Qırımtatar bayrağı üzerinde altın tamğa tasvir etilgen kök bayraqtır. Tantanalı tedbirler em Qırımda, em esas Ukrainada, em çetelde ötkerile.
