Rusiye kontrolindeki Sudaq şeer mahkemesiniñ qadısı Yelena Bosi avgustnıñ 5-nde nariye silâsınıñ parçalarını qanunsız saqlağanında qabaatlanğan qırımtatar faali İlver Ametovnıñ cinaiy davası boyunca üküm çıqardı, dep haber ete Qırım.Aqiqat.
Onıñ malümatına köre, Ametov cinayet yapqanında qabaatlı tanıldı ve sekiz ay devamında er ay Rusiye İç işler nazirliginiñ yerli bölüginde qayd olmağa mecbur, Sudaqtan çıqması ve gece evden çıqması yasaqlana.
Avgustnıñ 4-nde munaqaşa vaqtında devlet qabaatlayıcısınıñ vekili mahkemeden Ametovnıñ azatlığını 10 ayğa sıñırlamasını istedi. İmaye faalni aqlamağa rica etti. Advokat Aleksey Rostovtsevniñ munaqaşalardan soñ bildirgenine köre, mahkeme qararı müvekkili içün menfiy olsa, o, istinaf şikâyetini berecek.
2019 senesi sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ aza şeadetnamesi, müzey eşyaları, bazı vesiqalar «ekspertizağa» alındı.
Dava malümatına köre, «2019 senesi sentâbrniñ 27-nde evde keçirilgen qıdıruv tedbirleri vaqtında İlver Ametovdan alınğan silâ bir namlu, qısqa namlu, tegiz namlu, kesken, bir kereden toldurılğan, «Nagan» sistemasınıñ (1895 s.) yedi tolu nariye ekvivalenti ola. Bir qutulı, bir mehanizmli, 1891-1930 seneleri nariye silâsınıñ parçalarınen».
2021 senesi iyül ayında İlver Ametovnıñ qabaatlav hulâsasından nariye silâsını qanunsız aluvnen bağlı qısım çıqarıldı.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Bu sene mayıs ayında berilgen malümatqa köre, Kreml kontrolindeki Sudaqnıñ Mirovoy mahkemesi İlver Ametovğa 150 biñ ruble para cezasını bermege qarar aldı. Para cezası onıñ iş adamı olaraq köstergen faaliyetinen bağlıdır.
İlver Ametov – qırımtatar milliy areketiniñ faali, Sudaq regional meclisiniñ reisi.
