Kremlniñ qırımlı esirleriniñ ikâyeleri aqqında kitap ukrayin tilinde çıqtı. "Qırımnıñ serbest sesleri" cıyıntığı yarımadanıñ işğali aqqında kerçekni aytmaqtan qorqmağan ve bunıñ içün Rusiye apishanelerinde yıllarnen yatqan 16 jurnalist aqqında ikâye ete, dep yaza ZMINA insan aqları merkezi.
Kitap Demokratiyağa qoltutuv milliy fondunıñ (NED) destegi altında Ukrayin PEN, The Ukrainians Media, Vivat neşriyatı ve ZMINA insan aqları merkeziniñ ortaq teşebbüsidir.
Bular tintüv ve makemelerni çekken, aq qorçalayıcı areketlerni meydanğa ketirgen, qanunsız tutulğanlarnıñ qorantalarına yardım etken, Rusiye Federatsiyasınıñ halqara añlaşmalarınıñ bozuluvı aqqında yazğan jurnalistlerniñ ikâyeleridir. İşleri içün olar Rusiye akimiyeti tarafından "terrorizm", "ekstremizm" ve "diversiya" sahte qabaatlavlar ile yedi yıldan on doquz yılğa qadar apis cezasına maküm etildi.
Kitap siyasiy mabüslerniñ portretlerinden ve saylanğan mektüplerden, kündeliklerden ve makemede çıqışlarndan ibaret olğan vesiqalı qısımdan ibaret. Qırımtatar kontekstine ayrı diqqat ayırıla, çünki qaramanlarnıñ çoqusı Qırımnıñ tamır halqınıñ vekilleridir.
"Rusiyeniñ büyük istilâsı başlağan soñ Kremlniñ Qırım esirleriniñ ikâyelerini yazmaq daa müim oldı: dünya Qırımnı ve cenk 2014 senesi yarımadanıñ işğalinden başlağanını unutıp başladı", — dep qayd ete leyhanıñ teşebbüsçisi Tetâna Teren.
Kitap üzerinde yazıcılar ve jurnalistler Olesâ Yaremçuk, Anastasiya Levkova, İrına Slavinska ve digerleri çalıştılar. Muarrir İnna Bereznitska oldı, kiriş sözüni ise qırımtatar halqınıñ lideri Mustafa Cemilev yazdı.
"Bu ayrı şahıslarnıñ ikâyeleri degil, bir nesilniñ ikâyesidir. Siyasiy mabüslerniñ arasında çeşit yaşta insanlar olsa da, çoqusı deñişüvler yeliniñ üfürgen 1980 senelerinde doğğanlar; iqtisadiy, içtimaiy-siyasiy, ğaye deñişken zamanında ösken insanlar; evleri tek Qırım degil, demokratiya, adalet ve öz ögünde namuslıq da olğan insanlardır", — dep qayd etti Anastasiya Levkova.
Kitapnı Vivat neşriyatınıñ saytından ve kitap tükânlarından elektron ve basma şeklinde satın almaq mümkün.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
