Ukraina prezidenti Petro Poroşenko Ukraina Birleşüv Kününde işğal etilgen Qırım ve Donbasnıñ işğal etilgen qısmınıñ sakinlerine muracaat etti.
«Birleşüv Kününde Ukraina sıñırlarında, amma işğal etilgen Qırımda, Lugansk ve Donetsk vilâyetleriniñ işğal etilgen topraqlarında yaşağan semetdeşlerimizge muracaat etemiz. Biz sizni unutmadıq. Sizni duşmandan azat etecek künni yaqınlaştırmaq içün er kün çalışamız», – dep yazdı Poroşenko içtimaiy ağlarda.
Onıñ aytqanına köre, «maqsadlarımızğa irişmek içün birlik ve birleşüvimizni pekitmek kerek».
«Şunıñ içün er kes bilmeli: Ukraina unitar devlet ola, tek bir devlet tili bar – Anayasada böyle yazıla. Bir de bir federatsiya ya da ayrı status olmaycaq. Yekâne mustaqil birlik Ukraina!», – dep aytıla haberde.
Qırımtatar halqınıñ lideri Mustafa Cemilev ukrainalılarnı Ukraina halq cumhuriyeti ve Ğarbiy Ukraina Halq Cumhuriyetiniñ birleşüv aktınıñ ilân etilüviniñ yüz yıllığınen tebrikledi.
Ukrainada yanvarniñ 22-nde UHC ve ĞUHC birleşüviniñ aktı ilân etilmesiniñ yüz yılı qayd etile.
Ukraina Birleşüv Künü er yıl Ukraina Halq Cumhuriyeti ve Ğarbiy Ukraina Halq Cumhuriyetiniñ bir ukrain devletine birleşüviniñ aktı 1919 senesi yanvarniñ 22-nde ilân etilgen künü qayd etilmekte.
Kyivde Birleşüv künü Ukraina reberligi, halq deputatları, ATO iştirakçileri, cemaat ve din teşkilâtlarınıñ iştirakinen tedbirlerniñ keçirilmesi planlaştırıla.
Paton köprüsinde kyivliler ve şeer musafirleri toplaşıp, «birleşüvniñ canlı silsilesini» yapacaq. O, Ukrainanıñ şarqı ve ğarbi birleşkeniniñ timsaoli olacaqtır. Tedbirde qırımlı faaller de iştirak etecek.
