Azat etilgen ukrain deñizciler, sabalıqtan soñ arbiy hastahaneden Odessağa ketecek, dep haber etti Facebookta Ukraina ombudsmeni Lüdmila Denisova
"Sabalıqtan soñ, deyerli bütün yigitlerimiz - deñiz askerleri - arbiy hastahaneden evge, Odessağa ketecek", - yazdı o.
Onıñ malümatına köre, sentâbrniñ 13-ünde körüşkende, deñizciler, Rusiye ve ilhaq etilgen Qırımnıñ türmelerinde bulunğan qalğan Ukraina vatandaşlarınıñ taqdiri aqqında soray edi.
"Men olarğa, bu istiqamette iş alıp barılğanını ayttım ve, bütün vatandaşlarımıznı azat etmek içün, imkânı olğan ve olmağan bütün şeyni yaparmız, dep ayttım", - yazdı Denısova.
Sentâbrniñ 7-nde Ukraina ve Rusiye arasında tutulğanlarnı deñişim kerçekleştirildi. 35 ukrainalı ile uçaq «Borıspil» Kyiv ava limanında qondı. Oleğ Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
