Rusiye mahkemesi tarafından mahküm etilgen “qırımlı musulmanlar davasınıñ” mabüsi 62 yaşında Qarasuvbazarlı faal Azamat Eyupov hastahanege alındı, o, gipertonik kriz keçirdi. Bu aqta Qırımtatar resurs merkezine Aliya Kurtametova, “qırımlı musulmanlar davasınıñ” daa bir mabüsi Tofik Abdulgaziyevniñ ömür arqadaşı, o, bu aqta körüşüv vaqtında bildirdi.
“Aqayım Eyupov Azamat ağa artqan qan basımınen hastahanege ketirilgenini ögrendim. 60 yaşında adam ve apiste dört insult keçirdi. Yüregim qabaatı tek imanı olğan qart bir musulmanğa yana”, – dep bildire Kurtametovnıñ aytqanlarını QRM.
Bıltır avgust ayında advokat Yevgeniy Goroşko Eyupov ekimler tarafından baqılmalı ve nevrolognıñ fikrini almalı, dep haber etken edi. O, SİZOda erkek dört işemik insult keçirdi, dep qoştı. Tibbiy yardım olmağanından Eyupov yardımsız yürip olamay edi.
Rusiyeniñ Cezalarnı yerine ketirüv federal hızmetiniñ hadimleri tarafından Eyupovnıñ sağlığınen bağlı resmiy haberler şimdilik yoq.
2021 senesi fevralniñ 17-nde Qırımda Qarasuvbazar, Bağçasaray, Aqmescit, Aqyar ve İçki rayonında kütleviy tintüvler keçirildi. Lenur Seydametov, Timur Yalkabov, Azamat Eyupov, Yaşar Şihametov, Ernest İbragimov ve Oleg Fedorov evlerinde keçirilgen tahqiqat tedbirlerinden soñ Qırımdaki FSB idaresine ketirildi. Soy-soplarına FSB tahqiqatçıları tutulğanlar Rusiye Ceza kodeksiniñ 205.5 maddesine istinaden qabaatlana. Qırımtatarlar Rusiyede yasaqlanğan, amma Ukrayınada ve bir çoq memlekette milliy qanunlar seviyesinde sıñırsız çalışqan «Hizb ut-Tahrir» teşkilâtı ile alâqaları bar olğanında qabaatlandı.
2022 senesi sentâbrniñ 9-nda Rostov-na-Donu Cenübiy okrugınıñ arbiy mahkemesi Yaşar Şihametovnı terrorizmde qabaatlap, 11 yılğa azatlıqtan marum etti.
Aq qorçalayıcılarnıñ fikirince, teşkilât azalarını ükümet devrimini azırlav ve terrorizm içün degil, firqa tarafdarlarınıñ Qırımda siyasiy repressiyalarğa qarşı cemaat aktsiyaları, Rusiye akimiyetini tenqit etkenleri ve qırımtatarlar 2014 senesi işğalge qarşı çıqqanları içün taqip eteler.
