Hizb ut-Tahrir davasınıñ «ekinci Aqmescit gruppasınıñ» mabüsi, faal Raim Ayvazov Ülyanovsk vilâyetiniñ Dimitrovgrad apishanesinden Rusiye Federatsiyası Arhangelsk vilâyetiniñ İK-21-ge etap etildi. Bu aqta «Qırım birdemligi» qırımlınıñ ömür arqadaşı Mavile Ayvazovanıñ malümatına esaslanıp yaza.
Berilgen malümatqa köre, etap uzun edi. Ayvazov apishaneden Ulyanovsk SİZOsına çıqarıldı, doquz kün anda qaldı. Qazan, Perm ve Yaroslavlden ketti.
«Ne yazıq ki, aqayım evden daa uzaq. Onı apishanege etap etkenlerinde Raim evge yaqın olsun dep ariza berdim, amma red cevabını aldım», – dep qayd etti qadın.
Etap vaqtında Ayvazovnıñ babası vefat etti. «Babası vefat etkenini qabul etmek zor edi», – dep tarif ete qırımlınıñ ömür arqadaşı.
«Memorial» aq qorçalayıcı merkezi Ayvazovnı siyasiy mabüs dep tanıdı.
2019 senesi martnıñ 27-nde Qırımda FSB, Rusiye İçki işler nazirligi ve Rosgvardiya hadimleri qırımtatar faalleriniñ, şu cümleden «Qırım birdemligi» cemaat birleşmesiniñ vekilleriniñ evlerinde tintüvler keçirdi. Umumen 24 insan yaqalandı. 2019 senesi martnıñ 27 ve 28-nde Aqmescitniñ Rusiye rayon mahkemesi bütün yaqalanğanlarnı yaqaladı, olarnıñ arasında Raim Ayvazov da bar edi.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
