#LiberateCrimea Qırımnı işğalden qurtaruv halqara areketiniñ Qırım bölügi, Qırımnıñ Rusiye yolbaşçısı Sergey Aksenov Qırımnıñ Rusiye ükümetinde Milletlerara munasebetler işleri devlet komitetiniñ yolbaşçısı Ayder Tippanı qırımtatarlar Qırımnıñ Rusiye parlamenti ve yerli şura qanunsız saylavlarında az iştirak etkeninden işten çıqardı, dep tüşüne.
Böyle fikirni #LiberateCrimea faalleri Qırım.Aqiqat mühbirine seslendirdi.
Faallerniñ malümatına köre, Ayder Tippağa qırımtatarlar toplu yaşağan yerlerde saylayıcılarnıñ 50%-ı rey bermesini temin etmege vazife berildi, amma 30% seviyesinde iştirak oldı.
«Rusiye ükümetinde Milletlerara munasebetler işleri devlet komitetindeki menbalarımıznıñ malümatına köre, Aksenov Ayder Tippağa sert bir şart qoydı – ya qırımtatarlarnıñ faal iştirakini temin etecek, ya da saylavlardan soñ öz isteginen işten ayırılacaq. Rusiyege qoltutqan müftiniñ ğayretleri ve bücette çalışqanlarnıñ reylerine baqmadan, Rusiyege qoltutqan işbirlikçiler kene memnün qalmadı. Meselâ, Sarı-Suda umumen 33% iştirak etti, aman-aman elli bozulğan bülleten. Aksenov çoqtan añlamalı edi, ne Tippa, ne de başqası qırımtatarlarnı Rusiyege qoltutmağa mecbur etemez», – dep tarif etkenler #LiberateCrimea Qırım bölüginde.
Ayder Tippa 2021 senesi martnıñ 10-ndan başlap Qırımnıñ Rusiye Milletlerara munasebetler işleri devlet komitetiniñ yolbaşçısı vazifesinde bulunğan edi. Bundan evel ise Qırımnıñ Curçı rayonınıñ Rusiye memuriyeti yolbaşçısınıñ birinci muavini edi.
Bu yıl baarde keçirilgen qanunsız prezident saylavlarında Rusiye işğal etken Qırımda qırımtatarlar toplu yaşağan yerlerde iştirak etkenlerniñ sayısı 45% civarında edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
