Uquq bozulmaycaq degen tenbi Qırımdaki Rusiye polis hadimleri tarafından aq qorçalayıcı Ayder Suleymanovğa berildi. Bu aqta «Qırım birdemligi» haber ete.
Berilgen malümatqa köre, subetler daa eki faalnen yapıldı: Nadir Aliyev ve Dilâver Ablayev.
Suleymanovnıñ aytqanına köre, yaşağan Canköy rayonınıñ Qambar Vaqıf (Perepelkino) köyüne Rusiye polisiniñ hadimi keldi. O, ziyaretiniñ aq qorçalayıcınıñ 2017 senesi Qırımda bir kişilik narazılıq aktsiyalarında iştirak etkeninen bağlı olğanını aytıp, «memuriy uquq bozuvları yapılmaycaq», dep tenbiledi.
«O, protokolnı imzalamağa rica etti, amma men razı olmadım. Areketlerimni qanunsız dep saymayım. Semetdeşlerimni ağır terror cinayetlerinde qabaatlağanlarınen razı olmağanım içün narazılıq aktsiyasına çıqqan edim», – dep tarif etti Suleymanov.
Aq qorçalayıcınen laf etken soñ polis hadimi Suleymanovnıñ qomşusı olğan Nadir Aliyevge yol aldı, amma o, evde yoq edi. Canköy rayonınıñ Yañı Canköy (Novostepnoye) köyünde yaşağan 56 yaşında faal Dilâver Ablayevge de Rusiye polisiniñ hadimi keldi.
«Böyle tenbiler daa evel çoq qırımtatarğa berildi, aralarında faaller, Qırımtatar Milliy Meclisiniñ faalleri, aq qorçalayıcılar ve «Qırım birdemliginiñ» mühbirleri bar. Aq qorçalayıcılar bunı maneviy basqı usulı dep saya, polis ise buña «profilaktika çaresi» dep ayta», – dep aytıla haberde.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
