Rusiyeniñ Ekinci Ğarbiy okrugınıñ arbiy mahkemesi jurnalist, ATR qırımtatar telekanalınıñ müdir muavini Ayder Mujdabayevni terrorizmge çağırğanında qabaatlap, altı yılğa üküm etti, dep haber ete TASS Rusiye devlet haber agentligi mahkemeniñ matbuat hızmeti bergen malümatqa esaslanıp.
«Mahkeme Mujdabayevni Rusiye Federatsiyası Ceza kodeksiniñ 205.2 maddesiniñ 2-nci qısmına istinaden (terror faaliyetine çağıruv, terrorizmni açıq aqlav ya da terrorizm propagandası) qabaatlı tanıp, ğıyabiy şekilde onı altı yılğa umumiy rejim koloniyasında qalmasına üküm etti ve dört yıl devamında saytlarnıñ muarrirligini yapmağa yasaqladı», – dep bildire TASS mahkeme qararını.
Mujdabayevniñ imayesi şimdilik açıq bir izaat bermedi.
2020 senesi mayısnıñ 22-nde ATR qırımtatar telekanalınıñ baş müdir muavini Ayder Mujdabayevniñ Twitterde bildirgenine köre, Rusiyede oña qarşı «terror faaliyetine açıq çağıruv, terrorizmni açıq aqlav ya da terrorizm propagandası» maddesine istinaden cinaiy dava açıldı.
Mujdabayevniñ aytqanına köre, cinaiy dava Facebookta «Sentsovnı qurtarmaq» kerek olğanına dair yazğanları sebebinden açıldı. Jurnalistniñ qayd etkenine köre, qararda «onıñ Rusiye casuslarını tutıp, avtomat qoymağa ve Putinden Sentsovnı olarğa deñiştirmesini talap etmege çağırğanı» aytıla.
2020 senesi iyünniñ 25-nde Rusiye Tahqiqat komiteti bildirdi ki, ATR telekanalınıñ baş müdir muavini, jurnalist Ayder Mujdabayev ğıyabiy şekilde «terrorizmde» qabaatlandı ve halqara qıdıruvğa ilân etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
