Ukraina Yuqarı Radasınıñ insan aqları vekâletlisi Lüdmila Denisova Rusiye SİZOsında tutulğaye qırımlı Ukraina tarafdarı faali Oleg Prıhodkonıñ alı sebebinden Rusiye ombudsmeni Tatyana Moskalkovağa muracaat etti.
Denisovanıñ malümatına köre, Prıhodkonıñ alı izolâtorda «pek fenalaştı». Onıñ hatırlatqanına köre, adamnıñ «hronik aşqazan içekler, siydik sistemasınıñ hastalıqları bar, eki taraflı eşitüv ve körüv problemleri bar». Ukraina ombudsmeni bildire ki, «faal az aydınlatılğan kamerada, sıçavul ve furun böceklerinen tutula».
«İnsan aqlarını ve esas serbestligini qoruv şartnamesine köre aqlarnıñ bu tarzda bozuluvı işkence ve insaniyetsiz munasebet olaraq sayıla ve Oleg Prıhodkonıñ ayatı ve sağlığı içün telükeli ola», – dep aytıla Denisovanıñ Facebook haberinde.
Bu sebepten o, Moskalkovağa muracaat etip, «Ukraina vatandaşınıñ aqları acele ğayrıdan tiklensin dep, tedbir almasına» çağırdı.
«Hususan, acele tibbiy baquv olmalı, BM mabüslerge yanaşuv qaidelerine köre tutuv şaraitleri yaratılmalı», – dep aytıla Denisovanıñ haberinde.
Moskalkova Ukraina ombudsmenine daa cevap bermedi, SİZO reberligi de bir şey izaatlamay.
Keçken afta Oleg Prıhodkonıñ qızı Natalya Şvetsova Rusiyeniñ Rostov-na-Donu SİZOsında tutulğan babasınıñ sağlıq vaziyeti fenalaştı, dep bildirdi.
2020 senesi yanvarniñ 16-nda berilgen malümatqa köre, Prıhodkonıñ yañı qabaatı aydınlatıldı – «patlayıcı madde ya da patlayıcı cihaznı qanunsız aluv, berüv, satuv, saqlav ya da taşuv». Prıhodko Lvivdeki Rusiye baş konsullıq binasını patlatmağa tırışqanında da qabaatlana.
Oleg Prıhodko 2019 senesi oktâbrniñ 10-nda tutuldı. Rusiye FSBsi onı terror ücümini azırlağanında ve patlayıcı maddelerni qanunsız yapqanında qabaatladı.
Qırım Muhtar Cumhuriyetiniñ prokuraturası Qırımda faalniñ apiske alınğanı sebebinden Ukraina Ceza kodeksiniñ 146-ncı maddesiniñ 1-inci qısmına istinaden (azatlıqtan qanunsız şekilde marum etüv) cinaiy tahqiqat başlattı.
Advokat Nazim Şeihmambetovnıñ malümatına köre, Prıhodko Aqmescit SİZOsınıñ mahsus blokunda tutula.
Bundan evel Prıhodko memuriy dava boyunca işğal etilgen Qırımda mesüliyetke çekildi.
Kreml kontrolindeki Qırımnıñ Saq rayon mahkemesi iyünniñ 25-nde qırımlığan 2 biñ ruble para cezasını berdi. Mahkeme onı Rusiye memuriy cinayetler kodeksiniñ 20.3 maddesiniñ birinci qısmına istinaden qabaatlı dep tanıdı. Qırım.Aqiqatnıñ elinde olğan mahkeme qararına köre, faalniñ evinde tintüv vaqtında tutıp alınğan eşya ve vesiqalarnıñ «tedqiqatı» «Prıhodko üçünci şahıslarnıñ bu eşya ve vesiqalarğa irişmesi vastasınen natsist timsallerini propaganda etkenini ve köstergenini» işaretlemekteN
Faalniñ özü evindeki bütün timsaller «antika», dava malümatında olğan svastikalı kölmek ise «suvenir» ve 2010 berli onda olmağanını ayttı.
2019 senesi fevralniñ 8-nde Qırımdaki FSB idaresiniñ hadimleri Oleg Prıhodkonıñ evini tintken edi. Quvetçiler ukrain timsalleri, «Svoboda» firqasınıñ bayraqları, qırmızı-qara bayraqlar, Stepan Banderanıñ süretleri, tehnika ve ev CD-disklerini aldı. Tintüvden soñ Prihodkonı Aqmescitke alıp ketkenler, anda faaliyeti ve esas Ukraina ile bağları aqqında sorap sorğuğa çekkenler.
