Kreml kontrolindeki Qırım Yuqarı mahkemesi faal Edem Bekirovnı aprelniñ 12-ne qadar apiste qaldırdı. İmaye faalniñ sağlıq vaziyetine esaslanıp, ev apsine avuştırılmasını rica etken edi. Bu aqta «Qırım birdemligi» cemaat birleşmesi Facebookta haber ete.
«Böyle bir adaletsiz mahkeme daa körmedim, meni aqaretleyler. 19 yıldan berli qoltuqtayaqlarnı qullanam, ağır hastam. Meni nezaret altında nasıl tutarsıñız. Ayaqsız nasıl qaçarım? Olmaycaq şey», – dep tekrarlay Bekirovnıñ aytqanlarını «Qırım birdemligi».
Berilgen malümatqa köre, oturışuv vaqtında Bekirov yaramadı, ekim çağırıldı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Ukraina Tış işler nazirligi mahkemeniñ qararına qarşı «sert narazılıq» bildirdi.
Yanvarniñ 15-nde Bekirov Aqmescit SİZOsından Semaşko Cumhuriyet hastahanesiniñ endokrinologiya bölügine tibbiy teşkerüvge avuştırılğan edi. Yanvarniñ 18-nde Ukraina Yuqarı Radasınıñ insan aqları vekâletlisi Lüdmila Denisova Bekirov hastahaneden çıqarılıp, Aqmescit SİZOsınıñ mahsus blokuna yollanıldı, dep bildirdi.
