Arhip Kuinciniñ hırsızlanğan «Ay-Petri. Qırım» resimi Moskvadaki Tretyakov galereyasınıñ sergisine qaytarıla, anda resim fevralniñ 17-ne qadar olacaq. Bu aqta Rusiye Medeniyet nazirliginiñ müzeyler departamentiniñ müdiri Vladislav Kononov Twitterde bildirdi.
Memurnıñ ekspertlerniñ malümatına esaslanıp bildirgenine köre, Kuinci resiminiñ vaziyeti «onıñ cam altında numayış etilmesine mania olmay».
Yanvarniñ 30-nda Rusiye uquq qoruyıcıları hırsızlanğan resimni Tretyakov galereyasına qaytardı.
Rus müzeyinde haber etilgenine köre, «eki-üç künden» resim Sankt-Peterburgğa ketecek, anda Devlet Rus müzeyinde buluna. Anda resimniñ şeklini qaytarmağa niyetleneler.
Yanvarniñ 27-nde Moskvadaki Tretyakov galereyasından ressam Arhiv Kuinciniñ resimi hırsızlandı. Er kişi müzey hadimi olaraq areket etip, resimni çerçiveden çıqarıp saqlandı.
Ertesi künü er kişi tutuldı, faqat Rusiye uquq qoruyıcılarına qabaatı olmağanını ayttı. Adı Denis Çuprikov, o, Moskvada mesüliyeti sıñırlanğan cemiyetniñ saibi ola. O, Qırımda Kefede doğdı, em Qırım, em Moskva bölgesinde iş qıdırdı, memuriy mesüliyetke çekilgen edi. Soñki vaqıtları o, Ödintsovo rayonınıñ Zareçye qasabasında yaşadı, anda da tutuldı. Resim de anda tapıldı.
Rusiye İç işler nazirligi resim hırsızlanğanınıñ videosını aydınlatqan edi.
Yanvarniñ 29-nde Moskvadaki Tagan ahkemesi Çuprikovnı tevqif etti.
Manzara resimleri ustazı Arhip Kuinci 1842 senesi Mariupol civarındaki Qarasu köyünde dünyağa keldi.
Kuinciniñ sergisi Tretyakov galereyasında bazar künü, yanvarniñ 27-nde, doğğan kününde açıldı.
